جاپان و اسلام آباد میٹرو پولیٹن کارپوریشن نا نیام اٹ کچرہ تے ہرفنگ و بِٹنگ نا چرجوئی ٹی 500 ملین جاپانی ین نا گرانٹ نا معاہدہ مس

اسلام آباد۔ 08 ستمبر (اے پی پی) جاپان و اسلام آباد میٹروپولیٹن کارپوریشن نا نیام اٹ کچرہ تے ہرفنگ و بِٹنگ نا رداٹ 500 ملین جاپانی ین نا گرانٹ نا معاہدہ غا دستخط مس۔ معاہدہ غا دستخط آتا دود سے شنبے نادے آ داڑے وزارت اقتصادی امور اٹی اڈ ہلک۔ معاہدہ نا رداٹ جاپان نا کنڈآن کچرہ تے ہرفنگ و بٹنگ کن اسلام آباد میٹروپولیٹن کارپوریشن ءِ 29گاڈی و ایلو تعلقدار گڑاتے فراوان کننگک۔ سیکرٹری وزارت اقتصادی امور نور احمد و پاکستان اٹی جاپان نا سفیر مستوداکونی نوری تینا حکومت آتا کنڈآن نوٹس آ گپ وتران کریر و گرانٹ معاہدہ غا دستخط کریر۔ داوخت آ گپ وتران کرسا سیکرٹری اقتصادی امور نور احمد پارے کہ پاکستان جاپان تون تینا تعلقداری تے قدر انا نظر اٹ ہرک۔ ہڑتوم آ ملک آک اہم علاقائی و جہانی باندات آ اسہ وڑ موقف تخرہ۔ اوپارے کہ پاکستان نا اقتصادی شونداری ٹی جاپان نا اقتصادی کمکاری اہم کڑد ادا کرینے۔ اوپارے کہ اسلام آباد میٹروپولیٹن کارپوریشن کن گاڈی و گڑاتا دروشم اٹ کمک ستاکڑزک ہراڑآن نن حکومت جاپان نا منت وار اُن۔ دا کمکاری آن اسلام آباد میٹرو پولیٹن کارپوریشن کچرہ تے یکجا کننگ و اوفتے ہرفنگ کن نقل و حمل اٹ کمک رسینگک۔ داڑآن سفائی ستھرائی نا چیلنج اتون مون تننگ اٹ اسلام آباد میٹروپولیٹن کارپوریشن نا کاریم نا کچ اٹ ودکی مریک۔ جاپان ہنداوڑ نا کمک کراچی ٹی ہم فراوان کننگ نا سلہ خلکونے۔ اوجاپان کن ہنداوڑنا امداد نا سلہ غا پاکستان اٹ جاپان نا سفیر نا منت واری ءِ ہرفے۔ سیکرٹری اقتصادی امور پارے کہ قدرتی آفت اتون مون تننگ ، نوکاپ ، زمی جمب و ایلو آفت آتیٹی جاپان مدام پاکستان نا کمک ءِ کرینے۔ ہراڑآ پاکستان نا حکومت جاپان نا حکومت و الس نا منت وار ءِ۔ اواومیت ظاہر کرے کہ بروک آ وخت اٹی ہڑتوم آ ملک آتا نیام اٹ کمکاری ٹی پین ودکی مریک۔