پاکستان بیت المال معذور بندغ آتا مصنوعی عزوہ غاتا پیوندکاری و جہانی ادارہ جان جوڑی نا آب انا رداٹ کمکاری ازباب آتا فراوانی نا بناءِ کرے

اسلام آباد۔ 08 ستمبر (اے پی پی) پاکستان بیت المال نا کنڈآن معذور بندغ آتا آخبتی وڑاٹ بحالی کن مصنوعی عزوہ غاتا پیوندکاری و جہانی ادارہ جان جوڑی نا آب انا رداٹ اسسٹیو ڈیوائسز نا فراوانی نا عمل نا بناءِ کرینے۔ دارداٹ پاکستان بیت المال نا کنڈآن صوبہ بلوچستان نا ضلع ڈیرہ بگٹی ٹی آئی ڈیز بلاسٹ آن زہمی بندغ و پیدائشی وڑاٹ معذور مروک آ بندغ آتا رجسٹریشن و معذور بندغ آتا بے پورو عزوہ غاتا پیمائش نا بابت مسہ دے ئی کیمپ اس اڈتننگا ہراٹی معذور بندغ آتا المی معلومداریءِ ہلنگا پی آئی پی او ایس نا کمک اٹ ہمووخت آ ساڑی معذور بندغ آتا مصنوعی عزوہ غاتا پیمائش و عارضی پنجر ہم تیار کننگا، ہرا مصنوعی عزوہ غاتا تیاری آن پد بھاز زوت معذور بندغ آتے نصب کننگک ہراڑآن او ایلو مخلوق آنبار پبی زند ءِ تیر کننگ کیرہ۔ ایم ڈی پاکستان بیت المال، عون عباس بپی نا کماشی ٹی وزیراعظم عمران خان نا ویژن و احساس رکھ پروگرام نا رداٹ مچ آ ملک اٹی معذور بندغ آتا آخبتی بحالی و اوفتا المی کمک ءِ کننگ تون اسسٹیوڈیوائسز فراوان کننگ کن دے و نن کوشست کننگ ءِ۔ ڈیرہ بگٹی کون آ مر مر انگا و پدسلوک آ علاقہ ٹی کیمپ خلنگ ہم ہنداکوشست آتا بشخ اسے۔