کوئٹہ۔ 08 ستمبر (اے پی پی) حکومت بلوچستان نا ترجمان لیاقت شاہوانی پارینے کہ بنجائی وزیر تعلیم نا کماشی ٹی 15 ستمبر آن اسکول آتے ملنگ نا فیصلہ ءِ کننگانے، صوبائی حکومت یک و نیم تُو مہالو ایس او پی تا کمک اٹ اسکول آتے ملنگ نا فیصلہ کریسس، داسہ 15 ستمبر آن بلوچستان اٹی تعلیمی ادارہ غاتے ملنگ نا فیصلہ ءِ کننگانے، اولیکو مرحلہ ٹی یونیورسٹی کالج، ارٹ میکو مرحلہ ٹی اسکول مڈل اسکان ملنگ نا فیصلہ ءِ کننگک، کورونا دین انا رداٹ ایس او پی تیا عملدرآمد المی مریک، اولیکو مرحلہ ٹی اسہ دے اس ایف ایس سی و ارٹ میکو دے بی اے، بی ایس سی نا کلاس آک مریرہ۔ داخیال آتا درشانی ءِ او سے شنبے نادے آ پریس کانفرنس آن تران کرسا کرے۔ ترجمان حکومت بلوچستان لیاقت شاہوانی پارے کہ کوئٹہ پرائمری کلاس اٹ مشکل آتون مون تروک مننگ کیک اسکول آتیٹی ہم اسہ دے اس ہلسا جتا کلاس آک مریرہ، اسکول آتیٹی داسہ استاد آتیا ایس او پی تا بابت زیات زمواری مریک۔ 25 اگست آن پد کورونا نا کیس آتیٹی ودکی آن پد اسکول آتے دمدستی ملنگ خواپنہ، اوپارے کہ ساڑی آ ہفتہ ٹی 440 کورونا نا کیس رپورٹ مس ہرا کیس آتا 16درسد ءِ وخت اس کہ 4 مرک ہم مسنے، 25 اگست آن کورونا نا اسہ پوسکن ءُ لہر اس بناکرینے اگہ دارداٹ کیس آتیٹی ودکی مس تو گڑتی ءِ کہ مئی جون والا حالیت ودی مننگ کیک، اومستی پارے کہ بی ایم سی نا طالب علم و ملازم آتا کنڈآن 5 دے مست دھرنا نا بناءِ کننگا، تدوک آ دے وزیراعلیٰ نا کنڈآن مذاکرات اٹ مین خواست ءِ امنا کننگا، دمدستی وڑاٹ اسہ نوٹیفکیشن اسے نا رداٹ خواست آتے امنا کننگابرانز مرے یا مف طالب علم آتا غٹ روا خواست آتے امنا کننگک۔ اسہ سوج اسے نا ورندی ٹی ترجمان حکومت بلوچستان پارے کہ منہ دے مست ماڈل کورٹ فیصلہ ترسا مجید خان اچکزئی ءِ باعزت بری کرے، پولیس نا کنڈآن مجید خان ءِ بری کننگ نا برخلاف اپیل کننگ نا فیصلہ ءِ کننگانے۔ او الس آن خواست کرے کہ او ایس او پی تیا عملدرآمد ءِ پک کیر۔
