وزیر خارجہ مخدوم شاہ محمود قریشی نا اوغانستان کن پندار سفیر منصور احمد خان تون گپ وتران
اسلام آباد۔ 07 ستمبر (اے پی پی) وزیر خارجہ مخدوم شاہ محمود قریشی پارینے کہ اوغانستان اٹی امن مچ آ ڈیہہ ٹی امن و سوگوی نا بابت المی ءِ۔ داہیت ءِ او اوغانستان کن پندار پاکستانی سفیر منصور احمد خان تون گپ وتران کرسا پارے ہرا دوشنبے نادے آ وزارت خارجہ ٹی اوڑتون اوڑدہی کرے۔ گپ وتران اٹی پاک اوغان تعلقداری، اوغان امن عمل تون اوار چندی باندات آتیا گپ وتران کننگا۔ وزیر خارجہ بطور سفیر اوغانستان پنداری آ منصور احمد خان ءِ مبارکبادی تس وپارے کہ نے دا پوسکن آ زمواری، نا شاندار سروس ریکارڈ ءِ مون آ تخسا تننگانے۔ وزیر خارجہ پارے کہ اوغانستان اٹی امن مچ آ ڈیہہ ٹی امن و سوگوی نا بابت المیءِ۔ اوپندار سفیر ءِ پارے کہ نی ہندن ءُ وخت اسے ٹی بطور سفیر تینا زمواری تے سنبھالنگ کن ہِننگ اُس ہراتم پاکستان ءِ داخلی و خارجی وڑاٹ بھاز انگا چیلنج آک مون تروک ءُ۔ وزیر خارجہ پارے کہ منصور علی خان کون آ بھلو آزموندہ اس تخوک سفارتکار نا وڑاٹ سفیر تعیناتی آن پاک اوغان ہڑتوم آ کنڈآتا تعلقداری ءِ پین سوگو کننگ اٹ کمک رسینگک۔ وزیر خارجہ پوسکن آ پندار سفیر ءِ کسبی باندات و فارن پالیسی اولیت آتا بابت خصوصی پارت کرے۔ پندار سفیر اوغانستان منصور احمد خان وزیر خارجہ نا کنڈآن تروک آ خصوصی پارت آتیا اونا منت واری ءِ ہرفے۔ منصور احمد خان داکان مست ویانا ٹی بطور سفیر تینا خذمت آتے سرتسنے۔
