اسلام آباد۔ 07 ستمبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پاکستان اسٹاک ایکسچینج ءِ ایشیانا ترندی اٹ شون ہلوک آ اسٹاک مارکیٹ نا اعزاز آ مبارکبادی ترسا پارینے کہ مشکل حالیت آتیٹی پاکستان اسٹاک ایکسچینج ہراکارکڑد انا درشانی ءِ کرینے او ستاکڑزک۔داہیت ءِ او پاکستان اسٹاک ایکسچینج اٹ پاور ہولڈنگ لمیٹڈ نا 200 ارب روپئی مالیت نا پاکستان انرجی سکوک نا بک بلڈنگ و لسٹنگ نا دود آن تران کرسا پارے۔ وزیراعظم نا سلاہکار دا وخت آ مہمان خاص ئس۔ سیکورٹیز اینڈ ایکسچینج کمیشن نا چیئرمین عامر خان، گورنر اسٹیٹ بینک رضاباقر، پاکستان اسٹاک ایکسچینج نا چیئرمین سلیمان ایس مہدی و بورڈ باسک آک، سی ای او فرخ خان، نیشنل بینک آف پاکستان و ایلو بینک و مالیاتی ادارہ غاتا بڑزکو کمامدار و واپاری و کاروباری شخصیت آک ہم داوخت آ ساڑی ئسر۔ وزیراعظم نا سلاہکار سکوک نا بناکننگ ءِ بھرمی کروک آ ٹیمءِ مبارکبادی تس۔ اوپاکستان اسٹاک ایکسچینج نا کارکڑد انا ستاءِ کرے و پاکستان اسٹاک ایکسچینج ءِ ایشیانا ترندی اٹ شون ہلوک ءُ مارکیٹ اس جوڑ کننگ آ اسٹاک ایکسچینج نا چیئرمین، بورڈ و عملہ ءِ مبارکبادی تس۔ اوپارے کہ ساڑی آ چیلنج و کراچی نا ساڑی حالیت آتا رداٹ سکوک نا لسٹنگ سفت نا قابل ءِ۔ اوپارے کہ دا غٹ وزارت خزانہ نا ڈیٹ آفس، سیکورٹیز اینڈ ایکسچینج کمیشن آف پاکستان، اسٹیٹ بینک و پاکستان اسٹاک ایکسچینج نا اسیجائی کوشست آتے اٹ ممکن مسنے۔ وزیراعظم نا سلاہکار پارے کہ اولیکو وار حکومت مسابقتی بک بلڈنگ پراسیس نا کمک اٹ کائی بور آن کم کچ آ اسکوک نا کمک اٹ 200 ارب روپئی یکجا کننگا۔ دا عمل اٹ وام تا پدی تننگ اٹ 10 سال اٹی 18 ارب روپئی نا بچت کننگانے۔ دود آن سیکورٹیز اینڈ ایکسچینج کمیشن نا چیئرمین عامر خان و پاکستان اسٹاک ایکسچینج نا چیف ایگزیکٹو آفیسر تون اوار ایلو شخصیت آک ہم تران کریر۔ وزیراعظم نا سلاہکار داوخت آ اسکوک اٹ بشخ ہلوک آ اسٹیک ہولڈر آتیٹی یات گاری دستاویز ہم بشخا۔
