اسلام آباد۔ 07 ستمبر (اے پی پی) کورونا نا دین اٹی روزگار نا رکھ اکن اسٹیٹ بینک انا اسکیم نا رداٹ داتم اسکان 14 لکھ، 27 ہزار 97 ملازم آتا روزگار ءِ رکھ فراوان کننگانے۔ اسٹیٹ بینک کورونا دین انا سوب آن ودی مروک آ زرگزرانی مشکل و بے روزگاری ءِ توننگ کن دا اسکیم ءِ درستی راستی کرفینے۔ اسکیم نا رداٹ کاروباری ادارہ غاک آخبتی، کنٹریکٹ و دیہاڑی دار آتون اوار ہروڑنا ملازم آتے تنخواہ تا زرتس اکن اڑزآن وام دوئی کننگ کیرہ۔ اسکیم نا رداٹ اپریل 2020ء آن ستمبر 2020ء ٹی تینا ملازم آتے اینک کپروک آادارہ ملازم آتا مسہ تُو انا تنخواہ تیکن 5 درسد شرح سود آ وام ہلنگ کیرہ۔ فعال خراج گزار آتا فہرست اٹ اوار ادارہ غاتے 4 درسد نا کچ آ وام ہلنگ نا آسراتی تننگانے۔ اسٹیٹ بینک انا کنڈآن جاری کروک حساب وکتاب نا رداٹ دا اسکیم نا رداٹ 3063 کاروباری ادارہ و کمپنیک 17 لکھ، 8 ہزار، 156 ملازم آتا روزگار نا رکھ اکن 2 کھرب، 35 ارب، 93 کروڑ، 20لکھ روپئی آن زیات نا وام اکن درخواست دائر کریر۔ حساب وکتاب نا رداٹ اسٹیٹ بینک دافتیان 2429 ادارہ و کمپنی تا کنڈآن اسہ کھرب، 83 ارب 43 کروڑ، 10 لکھ روپئی اسکان نا وام درخواست آتا منظوری ءِ تس و ہنداوڑ 14 لکھ، 27 ہزار، 97 ملازم آتا روزبار ءِ رکھ فراوان کننگانے۔
