اسلام آباد۔ 07 ستمبر (اے پی پی) جہانی بینک پارینے کہ کوروناوائرس نا دین انا زہم آتے کم کننگ و نوکاپ تون مون تننگ کن بینک سندھ حکومت تون کمک کننگ ءِ۔ داہیت ءِ پاکستان اٹی جہانی بینک انا کنٹری ڈائریکٹر ناجی بن حسائن راجی رابطہ نا ویب سائٹ ٹویٹر آ جاری کلہو آتیٹی پارینے۔ اوپارے کہ خاص وڑاٹ ضلع دادو ٹی نوکاپ آن بند آتے سوگو کننگ کن سندھ ریزیلئینس پروجیکٹ آن محکمہ آبپاشی سندھ ءِ ہلہلہ ئی بنداو تیا 20 لکھ ڈالر نا کمک فراوان کننگ انگ ءِ۔ اوپارے کہ جہانی بینک سندھ حکومت تون اواری اٹ سویپ پروجیکٹ ءِ حتمی دروشم اس تننگ ءِ۔ داپروجیکٹ نا بنداوی مسخت کوروناوائرس نا زہم آتے کم کننگ و نوکاپ تون مون تننگ اٹ کمک فراوان کننگ نا ءِ۔ پروجیکٹ نا رداٹ کراچی ٹی کچرہ تے جوان وڑاٹ ہرفنگ اٹ ہم کمک فراوان کننگک۔ ناجی بن حسائن پارے کہ کراچی ٹی داوخت آ نوکاپ آن پد انا حالیت آتا رداٹ سندھ حکومت تینا وسیلہ غاتیان فنڈ جاری کیک۔ سویپ پروجیکٹ نا منظوری آن پد سندھ انا حکومت ہلہلہ ئی گرج آتیکن کاریم اٹ اتوک آ فنڈ آتا واپسی کن درخواست تننگ کیک۔
