اسلام آباد ۔ 5 ستمبر (اے پی پی) مزن وزیر عمران خان ءَ گوشت کہ پاکستان ءِ بے دروریں راجدپتر ءَ 6 ستمبر ءِ روچ مئے دلیریں سلاھ بندیں ارد ءِ مزن جگری، جزم ءُ قربانی ءِ بے مٹیں جوزگ ءِ چیدگ انت، لائن آف کنٹرول ءِ سر ءَ ھم بھارت ءِ نیمگ ءَ کشاں چیل ءِ مول ءُ مراد دگنیا ءِ دلگوش ءَ را کودکیں کشمیری آنی لگت مالی ءَ را چیر دیگ انت۔ پاکستان ایمنی لوٹ ایت بلے اے لیکہ ءِ رد ءَ مارا ھمزور پھمگ مہ بیت، مئے ایمنی ءِ واھشت زرباری ایشیا ءِ الس آنی اقتصادی گہبود ءُ وشھالی ءِ واستہ انت، مارا ایمنی ءِ ھاترا ءُ آیوکیں باھند آنی واستہ یک مشت بوھگ ءُ کار کنگ ءِ ضلورت انت۔ اے ھیالانی درشانی آئی ءَ یوم ءِ دیمپانی ءِ موہ ءَ راج ءِ نام ءَ وتی ھاسیں کلوہءَ کت۔ مزن وزیر ءَ گوشت کہ پاکستان ءِ راجدپتر ءَ 6 ستمبر ءِ روچ مئے دلیریں سلاھ بندیں ارد ءِ جزم ، ءُ قربانی ءِ بے دروریں جوزگ ءِ چیدگ ءِ رنگ ءَ برجم دارگ بیت۔ 55 سال ءَ پیسر پاک ارد ءِ اپسرگ ، سپاھی، بحریہ ءِ ورنا ءُ فضائیہ ءِ شاہین آں شرپ مندیں پاکستانی راج ءِ گوما ھمگامی ءَ دگنیا ءَ سہرا کتگ کہ آ ھمک نیاد ءِ سر ءَ ماتیں وطن ءِ کنڈ کنڈ ءِ دیمپانی ءِ واستہ ھمک ساھت تیار انت۔ راج ءُ سلاھ بندیں ارد ءَ سہرا کتگ کہ جوزگ ءُ مزن جگری ءُ دلیری درستاں چہ مستریں ارزشت دار ایت۔
