تعلیمی ادارہ غاتے ملنگ نا حتمی فیصلہ ءِ 7 ستمبر آ بین الصوبائی وزرائے تعلیم کانفرنس اٹ کننگک
اسلام آباد۔ 04 ستمبر (اے پی پی) بنجائی حکومت پارینے کہ 15 ستمبر آن تعلیمی ادارہ غاتا ملنگ نا بابت سلاہ تیا سجفنگ انگ ءِ، ولے دا بابت حتمی فیصلہ 7 ستمبر آ بین الصوبائی وزرائے تعلیم کانفرنس اٹ کننگک، کورونا دین آں حالیت آتا گچین مننگ نا حالیت اٹ تعلیمی ادارہ غاک متکن آ شیڈول آ بریرہ، اسکول آتا ملنگ آن پد ٹیچر و ہیڈ ٹیچر ناکڑداہم مریک۔ لرننگ ءِ گچین کننگ کن ننے آ جوان ءُ سلاہ بننگ ءِ ، کوویڈ۔ 19 نا حالیت آک مست انا نسبت بھاز گچین ءُ، دا ناجوڑ داسکان چٹتنے پاکستان تون اوار مچ آ دنیا ٹی داسہ ہم ارے۔ ایس اوپی تیا عملدرآمد نا گرج ءِ، کلاس آتا سائز ءِ کم کننگ المی ءِ، کم قوت مدافعت والا چناتے اولیکو مرحلہ ٹی اسکول آ مون تننگپ،راجی فاصلہ، ماسک انا کاریم اٹ اتنگ و باقاعدگی اٹ دوتے سلنگے، تعلیمی ادارہ غاتا ملنگ آن لمہ و باوہ استاد آتا زمواری پین ودک۔ داخیال آتا درشانی ءِ او بنجائی وزیر تعلیم شفقت محمود و وزیراعظم نا خصوصی کمکار جان جوڑی ڈاکٹر فیصل سلطان جمعہ نادے آ این سی او سی ٹی پریس کانفرنس آن تران کرسا کریر۔ پریس کانفرنس آن تران کرسا بنجائی وزیر تعلیم پارے کہ تعلیمی سرجز آتا بناءِ کننگ نا بابت چندی سلاہ تیا سجفنگ انگ ءِ نہہ می و دہ می، یانزدہ می، دُوانزدہ می و یونیورسٹی 15 ستمبر آن ملنگرہ اوکان پد اسہ ہفتہ غان پد شش آن ہشت اسکان کلاس و اگہ 30 ستمبر اسکان کورونا نا حالیت آک سہی مسر تو پرائمری اسکول آتے ملنگک۔ اوپارے کہ داسہ سلاہ اسے حتمی فیصلہ 7 ستمبر آ کننگک۔ بنجائی وزیر پارے کہ کوروناوائرس نا دین انا سوب آن 6 تُو آن چناتاخواننگ زہمی مس، پرائیویٹ اسکول آتیا ہم بھاز اثرتما، اللہ نا فضل اٹ ملک اٹی کوروناحالیت آتیٹی بھاز گچینی بسنے اگہ ہنداحالیت مس تو تعلیمی ادارہ غاک متکن آ شیڈول آ بریرہ۔ اوپاریر کہ کورونا نا سوب آن تعلیمی بشخ آ مرتب مروک آ زہم آتا انداز ہ ءِ ، اوپارے کہ تعلیمی ادارہ غاتا ملنگ آن پد استاد آتا کڑد اہم مریک، ہراکہ چنااسکول آ کاہک ولدا زمواری ٹیچر نا ءِ، کوروناوائرس نا دین داسکان چٹتنے، ایس او پی تیا عملدرآٰمد ءِ پک کروئی مریک ۔ بنجائی وزیر تعلیم پارے کہ دامشکل مرحلہ ضرور ارے کوشست ءِ کہ اسہ جوان ءُ وڑاسے ٹی دادے ایسر کین۔ اوفک پاریر کہ چناتا لرننگ ءِ گچین کننگ کن چندی سلاہ تننگ انگ ءِ۔ پریس کانفرنس آن تران کرسا وزیراعظم نا خصوصی کمکار جان جوڑی ڈاکٹر فیصل سلطان پارے کہ 15 ستمبر آن پدریسہ اسکول آتے ملنگک ولے حتمی فیصلہ 7 ستمبر آ کننگک۔ اوپارے کہ غٹ آن مست شکر ءِ کہ پاکستان اٹ کورونا دین انا پوسکن آ کیس و مرک آتا کچ اٹ کمتی بسنے، کوروناوائرس نا دین اتون مون تننگ کن تعلیمی ادارہ غاتا بند مننگ نا فیصلہ بھاز اہمیت تخاکہ، ملک اٹ کم و ود 5 کروڑ ورنا و چناتعلیمی سرجزآتیٹی بشخ ہلنگ ءُ، اومیت ءِ کہ تعلیمی ادارہ غاک پدریسہ ملنگرہ، راجی فاصلہ، ماسک انا کاریم اٹ اتنگ و باقاعدگی اٹ دوتے سلنگے، تعلیمی ادارہ غاتا ملنگ آن لمہ و باوہ و استاد آتا زمواری پین ودک۔ خصوصی کمکار پارے کہ کم قوت مدافعت والا چناتے اولیکو مرحلہ ٹی اسکول آ مون تننگپ۔ خصوصی کمکار پارے کہ تعلیمی ادارہ غاتا ملنگ آن پد کلاس آتا سائز ءِ کم تخنگ المی ءِ، اگہ کلاس اٹ 40 چناءُ تو اسہ وخت اٹی 20 ءِ خوانفوئی ءِ۔ اوپارے کہ لمہ و باوہ ءِ ادارہ تون کمک کروئی مریک۔
