اسلام آباد۔ 04 ستمبر (اے پی پی) وزیراعظم عمران خان پارینے کہ سویلی پنجاب سیکرٹریٹ نا جوڑ کننگ آن پی ٹی آئی حکومت سویلی پنجاب نا الس تون کروک آ وعدہ ءِ پورو کرینے، مستین اٹ سویلی پنجاب نا الس و اوفتا ویل آتا ایسری ءِ گوجالنگسا کننگا، سویلی پنجاب کن جتا سالانہ شونداری پروگرام آن علاقہ ٹی شونداری و شونہالی نا پوسکن ءُ بشخ اس روشنا مریک، اختیار آتا گدریفنگ ء مرحلہ وار مون آ دننگے، الس نا زند اٹ گچینی اتنگ پی ٹی آئی حکومت نا اولیت ءِ۔ وزیراعظم آفس نا میڈیا آفس آن جاری بیان نارداٹ داخیال آتا درشانی ءِ او جمعہ نادے آ تینا کماشی ٹی سویلی پنجاب سیکرٹری نا جوڑ کننگ و ورکنگ نا بابت دیوان آن تران کرسا کرے۔ دیوان اٹی وزیر خارجہ شاہ محمود قریشی ساڑی وخت اس کہ وزیراعلیٰ پنجاب سردار عثمان بزدار، وزیر خزانہ پنجاب مخدوم ہاشم جوان بخت، چیف سیکرٹری پنجاب، ایڈیشنل چیف سیکرٹری سویلی پنجاب و ایڈیشنل آئی جی سویلی پنجاب ویڈیو لنک انا کمک اٹ دیوان اٹی بشخ ہلکر۔ دیوان اٹی وزیر خارجہ شاہ محمود قریشی پاکستان تحریک انصاف نا حکومت نا کنڈآن سویلی پنجاب نا الس نا است خواہی تا پوروی نا بابت عملی گام گیج، سویلی پنجاب سیکرٹریٹ نا جوڑ کننگ، انتظامی اختیار آتا گدریفنگو الس نا احساس محرومی تے چٹفنگ و اوفتا ویل آتے اوفتا درگہ غا ایسر کننگ نا بابت ہیت کرساپارے کہ سویلی پنجاب سیکرٹریٹ نا جوڑ کننگ آن پی ٹی آئی حکومت سویلی پنجاب نا الس تون کروک آ وعدہ ءِ پورو کرینے۔ اوپارے کہ ساڑی حکومت نا کنڈآن کروک آ عملی گام گیج آتے ہراڑے الس اٹ بے پناہ است بڈی رسینگانے ہموڑے تینا درستی راستی نا بابت سویلی پنجاب نا الس اٹ اومیت اس ودی مسنے۔ وزیر خارجہ بروک آ سال بجٹ نا بابت سویلی پنجاب کن جتا سالانہ شونداری پروگرام و پنجاب پبلک سروس کمیشن نا رداٹ ملازمت و ایلو نوکری تا بابت سویلی پنجاب نا الس کن کوٹہ نا سلاہ پیش کرے۔ وزیراعلیٰ پنجاب سویلی پنجاب سیکرٹریٹ نا بابت داتم اسکان مروک آ پیش رفت آ حوال ترسا وزیراعظم ءِ پارے کہ سویلی پنجاب کن سیکرٹریٹ ءِ جوڑ کننگانے دابابت پنجاب گورنمنٹ نارولز آف بزنس اٹ ترمیم کننگانے و داتم اسکان شانزدہ سیکرٹری تا سویلی پنجاب اٹ تعیناتی کننگانے۔ وزیراعظم ءِ پاننگاکہ جان جوڑی، تعلیم، پولیس، پلاننگ اینڈ ڈویلپمنٹ،لوکل گورنمنٹ، فنانس و ایگری کلچرنامحکمہ غاتے سویلی پنجاب آ گدریفنگانے۔ وزیراعظم ءِپاننگاکہ 15 اکتوبر 2020آن سویلی پنجاب سیکرٹریٹ باقاعدہ کاریم نا بناءِ کیک۔ وزیراعظم ءِ پاننگاکہ پوسکن آ سیکرٹریٹ نا بابت گچین ءُ نظام اس ٹہیفنگانے ہراٹی ٹیکنالوجی، ای گورننس و پیپر لیس کلچر ءِ درستی راستی کرفنگ آ خصوصی چکار کننگ انگ ءِ تانکہ الس نا ویل آتے اوفتا درگہ غا گچین و آسان وڑاٹ ایسر کننگ مرے۔ ایڈیشنل آئی جی انعام غنی ملتان و بہاولپور اٹ پولیس نا دفتر آتا جوڑ کننگ و پولیس تون تعلقداراختیار آتا گدریفنگ نا بابت حوال تس۔ وزیراعظم عمران خان سویلی پنجاب سیکرٹریٹ نا جوڑ کننگ نا بابت عملی گام گیج کننگ آ وزیراعلیٰ پنجاب وپنجاب حکومت نا کوشست آتا ستاءِ کرساپارے کہ سویلی پنجاب ءِ شناخت تننگ نا بابت عملی گام گیج پی ٹی آئی حکومت نا سویلی پنجاب نا الس تون است اٹ وابستگی، اوفتا مشکل آتا سما و ایسر و حکومتی منشور ءِ عملی دروشم اس تننگ نا شاہدی ءِ۔ اوپارے کہ مستین سویلی پنجاب نا الس و اوفتا ویل آتاایسر ءِ گوجالگنساکننگا۔ وزیراعظم صوبائی مالیاتی ایوارڈ نا گرج آ زور شاغسا پارے کہ سویلی پنجاب کن جتا سالانہ شونداری پروگرام آن علاقہ ٹی شونداری و شونہالی نا پوسکن آ بشخ روشنا مریک۔ وزیراعظم پارت کرے کہ اختیار آتا گدریفنگ ءِ مرحلہ وار وڑاٹ مون آ دننگے تانکہ انتظامی باندات آتے گچین و جوان وڑاٹ چلیفنگ مرے۔ وزیراعظم داہیت آ زور شاغاکہ پی ٹی آئی حکومت نا واولیت الس نا زند اٹ گچینی اتنگ نا ءِ۔ اوسویلی پنجاب انتظامیہ ءِ پارت کرے کہ حکومتی گام گیج آتا مخلوق نا زند آ جوان ءُ اثراس نظر برے۔ وزیراعظم پارت کرے کہ سویلی پنجاب سیکرٹریٹ و اختیار آتا گدریفنگ نا بابت پیش رفت آ اودے باقاعدگی اٹ معلومدار تخنگے۔
