اسلام آباد۔ 04 ستمبر(اے پی پی) بنجائی وزیر ڈٹ بندی، شونداری و خصوصی گام گیج اسد عمر نا کماشی ٹی نیشنل کمانڈ اینڈ آپریشن سینٹر نا دیوان اٹی صوبہ غاتیان تعلیمی ادارہ غاتیٹی جان جوڑی نا راہشون اصول آتیا عملدرآمدءِ پک کننگ آ زور شاغنگا۔ نیشنل کمانڈ اینڈ آپریشن سینٹر (این سی او سی) جمعہ نادے آ صوبہ غاتے پارت کرے کہ او زوت اسکول و ایلو تعلیمی ادارہ غاتا ملنگ نا پڑوآن مست محکمہ جان جوڑی نا کنڈآن جوڑ کروک جان جوڑی و رکھ انا راہشون اصول و ایس او پی تیا عملدرآمد ءِ پک کیر و زہمی مخلوق نا رابطہ نا پیدواری و اوفتے قرنطینہ کننگ نا گام گیج آتے پین گچین کیر۔ بنجائی وزیر ڈٹ بندی، شونداری و خصوصی گام گیج اسد عمر نا کماشی ٹی این سی او سی نا دیوان اٹی ویڈیو لنک انا کمک اٹ دوتے سلنگ نا بست وبند، مخصوص ٹیسٹنگ و مائیکرو سمارٹ لاک ڈاؤن نا تازہ انگا حالیت و تعلیمی ادارہ غاتا دُوارہ ملنگ نا بابت ڈٹ بندی نا بابت تیاری تیا گپ وتران کرے۔ داوخت آ اسد عمر پارے کہ صوبائی حکومت آک محرم الحرام اٹی السی مچی تا گمانی اثرآتے کم کننگ کن تینا ساڑی آ ٹیسٹنگ و قرنطینہ نا لائخی ٹی ودکی کیر۔ صوبائی نمائندہ غاک ویڈیو لنک انا کمک اٹ فورم ءِ ساڑی آ ٹیسٹنگ نا گنجائشت، مثبت بروک آ ناجوڑ آتا کچ، مثبت رجحان و اسکول آتا جانچ اکن فریم ورک آن معلومدار کریر۔ اوداہم مستی پاریر کہ صوبائی انتظامیہ کورونا ناجوڑ آتا ودوک آ مثبت تناسب اٹ محرم نا گمانی اثرآتیا نظر شاغانو و المی بست وبند آتے پک کننگ ءُ۔ فورم ءِ حوال تننگاکہ بلوچستان و آزاد کشمیر (اے جے کے) و ایلو صوبہ غاتے اوفتا ٹیسٹنگ نا لائخی تے ودفنگ کن ہروڑنا امداد فراوان کننگک۔
