اسلام آباد ۔ 3 ستمبر (اے پی پی) مزن وزیر عمران خان ءَ گشتگ کہ کراچی ءِ اُلس ءَ را ساپیں آپ ، سیوریج، سالڈویسٹ منیجمنٹ، شیپانی سپائی ءُ ٹرانسپورٹ ءِ ہوالگ ءَ بازیں جیڑہ ءُ جنجالانی دیمپانی کنگ بوہگ ءَ اِنت، گوست ءِ اے جیڑہ ءُ جنجال کس ءَ گیش ءُ گیوار ناکتگ اَنت، انوگیں ہور ءُ ہاراں انتظامی جیڑہ ءُ جنجال پدر کتگ اَنت۔ مزن وزیر کارگس ءِ میڈیا ونگ ءَ چہ جاری بیان ءِ ردءَ اےھیالانی درشانی آئی ءَ پنچ شمبے ءِروچءَوتی سروکی ءَ “کراچی ٹرانسفارمیشن پلان” ءِ ہوالگ ءَ مزن تک ءِ دیوان ءِ سروکی کنان ءَ تران کنان ءَ کتگ۔ دیوان ءَ بنجاہی وزیر اسد عمر، سینیٹر شبلی فراز، سید امین الحق، سید علی حیدر رضوی، گورنر سندھ عمران اسمعیل (وڈیو لنک)، چئیرمین این ڈی ڈ ایم اے لیفٹنٹ جنرل محمد افضل ءُ ہمگرنچیں محکمہ آنی سیکرٹری ہوار بوتگ اَنت۔ دیوان ءَ کراچی ءِ دیریگیں جیڑہ ءُ جنجال ءِ گیش ءُ گیواری ءِ ہوالگءَ منصوبہ بندی” کراچی ٹرانسفارمیشن پلان” ءِ چارءُ تپاسی کنگ بوتگ۔ دیوان ءَ گون تران کتگ ءُ مزن وزیر عمران خان ءَ گشتگ کہ ساپیں آپ، سیوریج، سالڈ ویسٹ منیجمنٹ، شیپانی سپائی ءُ ٹرانسپورٹ ءِ ہوالگ ءَ کراچی ءِ اُلس بازیں جیڑہ ءُ جنجالانی آماچ اَنت۔ مزن وزیر عمران خان ءَگشتگ کہ کراچی ءِ جیڑہ ءُ جنجالانی مستریں سبب انتظامی وت واجہی ءَ را یک جاہ کارمرز کنگ نابوتگ بلکیں بھر ءُبانگ کنگ بوتگ۔ اے ہوالگ ءَ بار بار ءَ بُنجاہی ءُ صوبائی حکومت ءِ نیمگ ءَ دلگوشی کنائینگ بوتگ ۔ مزن وزیر ءَگشتگ کہ وہد ءِ لوٹ اِنت کہ واٹر سپلائی سکیم، سیوریج ٹریٹمنٹ اینڈ ڈسپوزل، سالڈ ویسٹ منیجمنٹ ءُ بلڈنگ کنٹرول اتھارٹی ءِ زمہ واری ءَ یک زمہ داریں ایڈمنسٹریٹر ءُ لوکل گورنمنٹ ءَرا دیئگ بہ بنت۔
