اسلام آباد۔ 02 ستمبر (اے پی پی) نیشنل کمانڈ اینڈ آپریشن سینٹر نا دیوان اٹی تعلیمی ادارہ غاتیکن کورونا ٹیسٹنگ نا حکمت عملی آ گپ وتران کرے۔ نیشنل کمانڈ اینڈ آپریشن سینٹر (این سی او سی) چارشنبے نادے آ 15 ستمبر آن گمانی وڑاٹ اسکول آتے دُوارہ ملنگ نا بابت ٹیسٹنگ نا حکمت عملی آ گپ وتران کرے۔ بنجائی وزیر ڈٹ بندی، شونداری و خصوصی گام گیج اسد عمر نا کماشی ٹی این سی او سی دیوان اٹی اسکول آتا دُوارہ ملنگ و تعلیمی ادارہ غاتا حکمت عملی نا جاچ انا بابت دیوان اٹی ساڑی حالیت آتارداٹ جاچ ءِ ہلنگا۔ داوخت آ اسدعمر پارے کہ تعلیمی ادارہ غاتے ملنگ نا بابت شین تروک پروگرام آ وزارت تعلیم امنا کرینے۔ ولے بروک آ بھلا چیلنج دادے کہ مچ آ ملک انا 3 لکھ تعلیمی ادارہ غاتیٹی ایس او پی و جان جوڑی نا راہشون اصول آتے نافذ کننگ ناءِ و داچرجوئی ٹی غٹ تر چکار ہنداڑآٹی ءِ۔ فورم ءِ معلومدار کننگاکہ تعلیمی ادارہ غاتیٹی ٹیسٹنگ کن چار بنداوی اصول آتیا مبنی حکمت عملی اس تیار کننگانے۔ فورم ءِ معلومدار کننگاکہ 20 بھلا شار ہراڑے دا دین انا ہلوک آ جلہو مسنے، ہراٹی ملک اٹی رپورٹ مروک آ کوروناوائرس نا 76 درسد واقعات ءُ داکل گڑاتے مون آ تخسا تعلیمی ادارہ غاتیکن دا حکمت عملی ءِ جوڑ کننگانے۔ اومستی پارے کہ داحکمت عملی نا رداٹ طالب علم آتا بلاترتیب اسکریننگ ءِ کننگک وخت اس کہ استاد آتا اسکریننگ ءِ وقتا فوقتا کننگک۔
