اسلام آباد۔ 02 ستمبر (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ پولیو نا چٹفنگ کن گچین ومربوط گام گیج آتے پک کننگ انگ ءِ۔ حکومت پولیو نا چٹفنگ کن سنبرینگوک ءِ ، پولیو ورکر آک قومی ہیرو ءُ، جہانی برادری نا کوشست آک ستاکڑزرہ۔ داخیال آتا درشانی ءِ او چارشنبے نادے آ تینا کماشی ٹی پولیو نا جاچ دیوان آن تران کرسا کرے۔ دیوان اٹی بنجائی سیکرٹری جان جوڑی عامر اشرف خواجہ ہم ساڑی ئس۔ دیوان اٹی کوآرڈینیٹر قومی ایمرجنسی آپریشنز سینٹر ڈاکٹر رانا صفدر حوال تس۔ حوال اٹی ڈاکٹر صفدر پارے کہ کورونا وائرس نا دین انا سوب آن پولیو مہم چارتُو تعطل نا گواچی مس۔ جولائی و اگست اٹی سرسہب پولیو مہم چلیفنگا۔ غٹ مکتنہ فکر پولیو نا چٹفنگ کن پبی کڑد ادا کننگ ءُ۔ ستمبر اٹی قومی کہول آ پولیو مہم نا تیاری ءِ۔ مہم اٹی چار کروڑ چناتے پولیو پڑی کنفنگ نا ہدف ءِ۔ دیوان آن تران کرسا ڈاکٹر فیصل سلطان پارے کہ پولیو نا چٹفنگ کن گچین ومربوط گام گیج آتے پک کننگ انگ ءِ۔ حکومت پولیو نا چٹفنگ کن سنبرینگوک ءِ۔ اوپارے کہ پولیو ورکرآک قومی ہیرو ءُ۔ صوبہ غاتون اواری اٹ پولیو نا چٹفنگ کن حکمت عملی ٹی پین گچینی اتینہ۔ جہانی برادری نا کوشست آک ستاکڑزرہ۔ اوپارے کہ پاکستان ءِ پولیو فری ملک اس جوڑ کننگ کن اواری اٹ کاریم کینہ۔
