اقوام متحدہ۔ 02 ستمبر (اے پی پی) وزیراعظم عمران خان 25ستمبر آ اقوام متحدہ نا جنرل اسمبلی نا 75 می دیوان آن ویڈیو لنک انا کمک اٹ تران کیک، داہیت ءِ باضابطہ وڑاٹ جاری کروک ترانکارآتا بنائی مہشون اٹ پاننگانے۔ اقوام متحدہ نا 193 باسکی جنرل اسمبلی ٹی بڑزکو کہول انا عمومی شرہ نا بناء 22 ستمبر آ مریک۔ وزیراعظم عمران خان 25 ستمبر آ جنرل اسمبلی آن تران کیک، کورونا وائرس نا دین انا سوب آن داسال جہانی راہشون نیویارک مرمرسا ویڈیو لنک انا کمک اٹ جنرل اسمبلی آن تران کیک۔ فہرست نا رداٹ وزیراعظم عمران خان اقوام متحدہ نا جنرل اسملبی نا بیگہ نا دیوان آن تران کروک آ شش می مقرر مریک۔ اقوام متحدہ ٹی پاکستان نا سفیر منیر اکرم نیویارک اٹی ’’اے پی پی‘‘ نا خصوصی نمائندہ ءِ پارے کہ گمان ءِ کہ وزیراعظم عمران خان اقوام متحدہ ٹی اسہ وار ولدا کشمیری الس نا حق خودارادیت نا حق اٹ پبی تواربڑز و بھارتی بیدادی ءِ تالان کیک۔ اوپارے کہ وزیراعظم اقوام متحدہ نا جنرل اسمبلی نا دیوان آن تران اٹی پاکستان نا اوغانستان اٹی امن کن خیرخواہی نا کڑد، امن نا است خواہی، کورونا وائرس نا تنکی آ سرسہب ردعمل، پدتموک ملک آتیکن وام آن نجات و ایلو جہانی باندات آتیا ہم ہیت کیک۔ بھارتی وزیراعظم نریندر مودی وزیراعظم پاکستان عمران خان نا تران آن اسہ دے اس پد 26 ستمبر آ تران کیک۔ امریکی صدر ڈونلڈ ٹرمپ 22 ستمبر آ جنرل اسمبلی آن تران کیک۔ اقوام متحدہ نا جنرل اسمبلی نا دیوان 29 ستمبر اسکان برجاسلک۔ اقوام متحدہ نا جنرل اسمبلی نا صدر تیجانی محمد باندے تدوک آ تُو پاریسس کہ ہر باسک ملک، آبزرورسٹیٹ و یورپی یونین ءِ تینا پندار بڑزکو کہول انا عہدیدار نا کمک اٹ مہالو آن ریکارڈ کروک ویڈیو ءِ پیش کننگ کن پاننگانے، 15 منٹ اسکان محدود تخوک آ دا تران تے جنرل اسمبلی نا ہال اٹی نشان تننگک۔ دیوان نا وخت آ اقوام متحدہ نا جنرل اسمبلی نا ہال خورک مفک بلکن دا ویڈیوتے ہر ملک انا نمائندہ نا کمک اٹ پیش کننگک ہراہموڑے ساڑی مریرہ۔ ہنداوڑوڈول خصوصی بڑزکو کہول انا سیشن تیٹی ہم تینا کننگک ہراٹی اقوام متحدہ نا 75 می یوم تاسیس، حیاتیاتی تنوع آ کانفرنس و ایٹمی سلہہ غاتا پورو چٹفنگ نا جہانی دے انا بابت دیوان ہم اوار ءِ۔ اقوام متحدہ نا جنرل اسمبلی نا سالانہ دیوان آن مست اقوام متحدہ ٹی پاکستان نا سفیر منیر اکرم جنرل اسمبلی نا پوسکن گچین مروک آ صدر وولکان بوزکر تون 21 اگست آ اوڑدہی کریسس ہراٹی جنرل اسمبلی نا دیوان نا ایجنڈا غا گپ وتران کننگاسس۔ ترکی آن تعلق تخوک آ سینئر سفارتکار وولکان بوزکر 15 ستمبر آ جنرل اسمبلی نا پوسکن آ صدر نا عہدہ ءِ سنبھالک۔
