اسلام آباد۔ 02 ستمبر (اے پی پی) حکومت مچ آ ملک اٹی واپار و کاروبار نا مون آ دننگ کن گام گیج کرینے و آتھورائزڈ اکنامک آپریٹر (اے ای او) پروگرام دامسخت نا دوئی کننگ نا رداٹ اسہ اہم ءُ گام اسے، پائلٹ پروجیکٹ نا وڑاٹ ماڈل کسٹمز ءِ لیکٹوریٹ پورٹ قاسم کراچی ٹی برآمد آتیکن اے ای او پروگرام اکتوبر 2020ء ٹی بناکننگک۔ داہیت ءِ فیڈرل بورڈ آف ریونیو(ایف بی آر) نا کنڈآن داڑے جاری مروک آ بیان اٹی پاننگانے۔ ترجمان پارے کہ آتھورائزڈ اکنامک آپریٹر پروگرام ءِ کانودی دروشم اس تننگ کن کسٹمز ایکٹ 1969اٹی فنانس ایکٹ 2018 نا کمک اٹ شق 212اے انا ودکی کننگا۔ ایف بی آر 28 اگست آ جاری مروک آ ایس آر او 798(I)/2020نا کمک اٹ آتھورائزڈ اکنامک آپریٹر پروگرام نا کانود اس ہم مرتب کرینے۔ ترجمان پارے کہ ’آتھورائزڈ اکنامک آپریٹر پروگرام اپروول کمیٹی ‘ اس ہم ٹہیفنگانے ہرادرخواست گزار تا درخواست آتے حتمی دروشم اس تننگ ءِ۔ اے ای او پروگرام کن وی بوک و بزنس پراسیس کن سافٹ ویئر تیار کننگانے۔ ترجمان نا رداٹ ایف بی آر پائلٹ پروجیکٹ نا وڑاٹ ماڈل کسٹمز ءِ لیکٹوریٹ پورٹ قاسم کراچی ٹی برآمد آتیکن اے ای او پروگرام اکتوبر 2020اٹی بناءِ کننگ نا فیصلہ ءِ کرینے۔ ہراکہ اوکان پد درآمد آتیکن ہم بناکیک۔ ورلڈ کسٹمز آرگنائزیشن نا آتھورائزڈ اکنامک آپریٹر پروگرام واپار اٹی آسراتی و سیکورٹی ءِ پک کننگ اٹ اسہ اہم ءُ تمبہ سے نا حیثیت تخک۔ داپروگرام واپاری شریداری، شفاف و زرگزرانی شونداری نا ضامن تصور کننگک۔ آتھورائزڈ اکنامک آپریٹرزکیہی واپاری آسراتی و فائدہ دُن کہ ترند تر شپمنٹ پراسیسنگ، کسٹمز ادارہ غاتا نیام اٹ تین پہ تینی ہم آہنگی، مالی گارنٹی نا ہلنگ پین پین دوئی کننگ کیک۔ آتھورائزڈ اکنامک آپریٹرز اٹی مینو فیکچررز، درآمدکنندگان، برآمد کنندگان، پورٹس، ایئرپورٹس، ٹرمینل آپریٹرز، ڈسٹری بیوٹرز پین پین اوار ءُ۔ حکومت پاکستان داوخت آ اکنامک آپریٹرآتے درآمدات، برآمدات و ٹرانزٹ نا ودکی واپاری آسراتی تننگ نا بابت کیٹیگری سی ٹی اوار ءِ ہرانا سوب آن پاکستان 190 ملک آتیٹی 108 نمبر آٹی ءِ و زرکاری کن کم پرکشش ءِ۔
