بنجائی وزیر مذہبی امور پیر نور الحق قادری نا پاکستان اٹی یورپی یونین نا سفیر انڈریولا کمنارہ نا اوڑدہی ٹی گپ وتران

اسلام آباد۔ 01 ستمبر (اے پی پی) بنجائی وزیر مذہبی امور پیر نور الحق قادری تون سے شنبے نادے آ پاکستان اٹی یورپی یونین نا سفیر انڈریولاکمنارہ اوڑدہی کرے ہراٹی ہڑتوم آ کنڈآتا تعلقداری تون اوار تین پہ تینی است خواہی نا باندات آتیا گپ وتران کننگا۔ داوخت آ انڈریولاکمنارہ پارے کہ یورپی یونین بین المذاہب ہم آہنگی نا مون آ دننگ نا کوشست آتیٹی پاکستان تون تفوک ءِ۔ ساڑی حکومت نا کرتارپور راہداری ڈٹ بین المذاہب ہم آہنگی نا بڑزکو درور ءِ۔ کورونا وائرس نا ساڑی آ دین غٹ انسانی تپہ غاتے بھاز زہمی کرینے۔ وزیر مذہبی امور تینا گپ وتران اٹی پارے کہ وزیراعظم پاکستان نا وژن نا سوب آن کورونا وائرس نا دین انا بھلو حد اسسکان مون ءِ توننگانے۔ اقلیت آتا حق انا رکھ و راجی آسراتی کن قومی اقلیتی کمیشن اس ٹہیفنگانے۔ اقلیت آتا گچین نمائندگی ءِ کننگ کن اولیکو وار ہندرو کمیونٹی آن کمیشن نا سروک پن کرینے۔ قومی اقلیتی کمیشن ءِ ایکٹ آف پارلیمنٹ نا کمک اٹ پین گچین کننگک۔ بین المذاہب ہم آہنگی کمیٹی تے ضلعی کہول آ منظم کننگ انگ ءِ۔ مذہب نا جبری بدلی نا ویل آ منفی پروپینگڈا کننگ انگ ءِ۔ پیر نور الحق قادری پارے کہ پاکستان اقلیت آتا آجوئی و حق انا فراوانی نا لحاظ اٹ تینا ڈیہہ ٹی نمان ءِ۔پاکستان مچ آ دنیا نا اقلیت آتا حق اکن مدام توار بڑز کرینے۔