اسلام آباد۔ 01 ستمبر (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ جاپان پاکستان نا آزموندہ سنگت ملک ءِ ہرا مدام پاکستان نا مخ تفی و کمکاری ءِ کرینے، پاکستان و جاپان نا نیام اٹ تعلقداری ہرہنوک آ دے اتون پین سوگو مریک۔ اوداہیت ءِ سے شنبے نادے آ داڑے پاکستان اٹی جاپان نا سفیر کونی نوری مستودا تون اوڑدہی ٹی گپ وتران کرسا پارے۔ ڈاکٹر عبدالحفیظ شیخ جاپان نا سفیر نا ستاءِ کرسا پارے کہ جاپان پاکستان نا آزموندہ سنگت ملک ءِ۔ ہرامدام پاکستان نا مخ تفی و کمکاری ءِ کرینے۔ اواومیت ظاہر کرے کہ پاکستان و جاپان نا نیام اٹ تعلقداری ہرہنوک آ دے اتون پین سوگو مریک۔ جاپان نا سفیر وزیراعظم نا سلاہکار نا کنڈآن کمکاری و نیک است خواہی تیا اونا منت واری ءِ ہرفے، اوپاکستان اٹی ساڑی آ پِر تیٹی مروک آ جانی و ملکیت آتا نسخان آ ہڑزخواہی واست ہسونی نا درشانی ءِ کرے۔ اوگرج انا داساہت اٹ جاپان نا کنڈآن امداد نا فراوانی نا سلہ ہم خلک۔ جاپان نا سفیر اومیت ظاہر کرے کہ علاقائی امن و سوگوی سیاسی حالیت آتیان ڈیہہ ٹی واپار ءِ مون آ دننگک و داڑآن پاکستان ءِ گچین وارخواہی دوبریک۔ وزیراعظم نا سلاہکار جاپان نا سفیر ءِ تدوک آ اسہ سال اٹی ملکی زرگزران نا حالیت و کوروناوائرس نا اثرآتے کم کننگ کن حکومت نا کوشست آتیان معلومدار کرے۔ اوپارے کہ کوویڈ۔ 19 نا دین آن مست پاکستان نا زرگزران سہی سمت آ ہناکہ، حکومت خراج کٹیاتیٹی ودکی ٹی سرسہب ئس، حسابات جاریہ نانسخان نا مون ءِ توننگا، پرائمری سرپلس دوئی کننگا، خڑچ آتا مون ءِ توننگا، حکومت اسٹیٹ بینک آن وام ہلنگ آ پابندی خلک وخت اس کہ برآمد آتیٹی ودکی کن خوشگوار و سازگار ماحول اس فراوان کننگا۔ وزیراعظم نا سلاہکار پارے کہ او پُر اومیت ءِ کہ کورونا وائرس نا فعال کیس آتا کچ اٹ کمتی آن پاکستان اقتصادی سوگوی و بریبری ءِ دُوارہ دوئی کننگ اٹ سرسہب مریک۔ جاپان نا سفیر پارے کہ اونا ملک پاکستان تون واپاری و اقتصادی تعلقداری تے ودفنگ خواہک۔ اوپارے کہ جاپان پاکستان آن امب، برنج، مچھی، و ٹیکسٹائل مصنوعات درآمد کننگ نا است خواہی تخک، اووزیراعظم نا سلاہکار ءِ پارے کہ جاپان وام تیٹی ریلیف کن پاکستان تون کمک کیک و دا گام گیج آ بنائی کاریم آن پد پاکستان تون رسمی وڑاٹ مفاہمت نا دستاویز آتیا دستخط مریک۔ جاپان نا سفیر پاکستان ءِ گمانی مخ تفی و کمکاری نا باوری کرفے۔
