اسلام آباد۔ 01 ستمبر(اے پی پی) وزیر خارجہ مخدوم شاہ محمود قریشی پارینے کہ بھارتی غیر کانودی مقبوضہ کشمیر اٹی بھارت محرم الحرام اٹ ظلم و بیدادی نا ہمو منظر ءِ پیش کرے، ہرانا درور ملیپک، مچ آ امت مسلمہ اٹی بھارتی رویہ غا غم و غصہ ءِ۔ جہانی میڈیا و تنظیمک بھارتی بیدادی نا برخلاف اسیجائی توار چست کیر۔ سے شنبے نادے آ مقبوضہ کشمیر نا حالیت آتا بابت اسہ بیان اسے ٹی وزیر خارجہ پارے کہ مقبوضہ جموں و کشمیر اٹی، مذہبی رواداری نا دروغ انا دعویدار، بھارت سرکار نا ظلم و جور کاٹم آن گدرینگا۔ اول تو عزاداری نا جلوس آتے کشنگ نا موکل تننگتو، اوکان پد جلوس آتیٹی بشخ ہلوک آتے بیدادی نا شست کننگا دزگیری کننگا۔ پیلٹ گن آتے کاریم اٹ اتنگا۔ عئید انا وخت آ نن خنان کہ مسیت آتے تالا خلفنگا و داسہ محرم الحرام اٹی ظلم و بیدادی نا ہمو منظر ءِ پیش کننگا ہرانا درور ملیپک۔ مچ آ امت مسلمہ ٹی دا بھارتی رویہ غا بھاز غم و غصہ ءِ۔ وزیر خارجہ پارے کہ ای دا وخت آ پاکستان نا غٹ شاری تا، عالم دین تا و ہمو غٹ مکاتب فکر انا منت واری ءِ ہرفنگ خواوہ ہرافک محرم الحرام اٹی یکجہتی،، رواداری و وضع داری نا شاہدی ءِ تسر ہرافتا سوب آن غٹ پروگرامک خیروخیریت اٹ مسر و شرانگیز واکدارتے تینا مسخت آتا دوئی کننگ اٹ بے سہبی مس۔ بھارت اٹی اینو کورونا ترندی اٹ تالان مننگ ءِ حیرت نا ہیت دادے کہ مقبوضہ کشمیر اٹی کورونا دین اٹی ہم بھارتی بیدادی برجاء ءِ۔ ہندوستان کرونا نا دین اٹی مس ہنڈلنگ کرے۔ اوپارے کہ کنا 21 اگست آ چین نا دورہ، چین نا وزیر خارجہ وانگ ژی اتون اوڑدہی مس۔ اوکنے لداخ نا حالیت، بھارت نا کنڈآن کروک آ غیر کانودی گام گیج و چین نا کنڈآن کروک آ دفاعی گام گیج آتیان سرجم معلومدار کرے۔ چین چاہک کہ دنیا راستکی تیان جوانی اٹ بلد ءِ چین ءِ تینا نکتہ نظر و تینا فورس آتیا پت ءِ۔ بھارت نا دعویٰ تیٹی ہچ ءُ دم خم اس اف بھارت مہالو ہم چین اتون پنجہ آزمائی کرے و تینا فوجی تا لاش تے ہلسا نرا۔ پاکستان بھارتی غیر کانودی مقبوضہ جموں و کشمیر اٹی برجاانسانی حق انا خلاف ورزی تے ہر فورم آ گچین وڑاٹ چست کننگ ءِ۔ اوپارے کہ ای زبانی وڑاٹ ہم و نوشتہی وڑاٹ ہم بھارت نا جارحانہ عزم آن دنیا ءِ معلومدار تخانٹ۔ سول سوسائٹی و انسانی حق آکاریم کروک آ جہانی تنظیمک و خاص وڑاٹ جہانی میڈیا دا بابت اسیجائی توار چست کروئی مرے۔
