اسلام آباد۔ 31اگست (اے پی پی) صدر مملکت ڈاکٹر عارف علوی پارینے کہ پاکستان آذربائیجان تون سیل و سوات، واپار، دفاع و توانائی تون اوار چندی بشخ آتیٹی پین کمکاری نا خواہندار ءِ، ہڑتوم آ ملک آتا نیام اٹ واپاری کچ اٹ پین ودکی کن کوشست کننگے۔ داخیال آتا درشانی ءِ او آذربائیجان کن پندار پاکستانی سفیر بلال حئی تون گپ وتران کرسا کرے ہرا دوشنبے نادے آ داڑے اوڑتون اوڑدہی کرے۔ ایوان صدر آن جاری بیان نا رداٹ صدر مملکت پارے کہ پاکستان آذربائیجان تون تعلقداری تے خاص اہمیت ایتک، پاکستان و آذربائیجان نا نیام اٹ زرگزرانی، سیاسی، دفاعی و دودوربیدگی مراسم ءِ۔ اوپارے کہ پاکستان آذربائیجان تون سیل و سوات، واپار، دفاع و توانائی تون اوار چندی بشخ آتیٹی پین کمکاری نا خواہندار ءِ۔ اوپارے کہ کورونا دین اٹی آذربائیجان نا کنڈآن پاکستان ءِ امداد فراوان کننگ نا منت وار اُن، کورونا دین اٹی آذربائیجان اٹی اختہ 522 پاکستانی تا پدی اتنگ کن آذربائیجان نا منت وار اُن۔ اوپارے کہ آذربائیجان تون تعلقداری تے پین سوگو کننگ کن بڑزکو کہیول انا دیوان تا باقاعدگی اٹ اڈتننگ بھاز المی ءِ۔ اوپارے کہ او اومیت کیک کہ پندار سفیر آذربائیجان تون تعلقداری تے پین مون آدننگ کن تینا کڑد ءِ اداکیک۔ اوپارے کہ پندار سفیر پاکستان و آذربائیجان نا نیام اٹ واپاری کچ اٹ پین ودکی کن کوشست آتے پین ترند کے۔
