اسلام آباد۔ 31 اگست (اے پی پی) وزیراعظم نا سلاہکار خزانہ و محصولات ڈاکٹر عبدالحفیظ شیخ پارینے کہ کوویڈ۔ 19 نا دین آن ودی مروک آ حالیت و ویل آتے کم کننگ اٹ جہانی برادری نا اجتماعی کوشست المی ءِ، شون ہلوک و امداد تروک آ ملک آتا کنڈآن پدتموک و نزور زرگزران تیکن وام تیٹی ریلیف دارداٹ گچین ءُ گام اس پک مننگ کیک، پاکستان پڑک 20 ملک آتا کنڈآن وام تا زرتس اٹی آسراتی و آئی ایم ایف، جہانی بینک، ایشیائی شونداری بینک و اقوام متحدہ نا ایلو ادارہ غاتا کنڈآن دمدستی کمکاری نا گام گیج آتا ستاءِ کیک۔ پدتموک و کم کٹیا والا ملک آتے مون تروک چیلنج آتون مون تننگ کنج جہانی عزم و کمک نا گرج ءِ۔ داہیت ءِ او ایشیائی شونداری بینک و اقوام متحدہ نا اقتصادی و راجی کمیشن ایشیہاو بحرالکاہل نا کنڈآن آن لائن سیمینار آن تران کرساپارے۔ وزیراعظم نا سلاہکار پارے کہ کوویڈ۔ 19 نا سوب آن دنیا اسہ سنگین ءُ حالیت آتون مون تننگ ءِ، حقیقت اٹ دا1930نا عظیم کسادبازاری آن ہم بدترین حالیت ءِ، دنیا کوویڈ۔ 19 نا دین اکن تیار الوکہ۔ اوپارے کہ دنیا نا ایلو ملک آتیانبار پاکستان ہم دا جہانی دین آن زہمی مس، پاکستان دا دین اتون مون تننگ و تینا زرگزران و شاری تے بچفنگ کن کیہی گام گیج کرے، حکومت زرگزران اٹ کیش اوار کننگ کن اسہ پروگرام اس جوڑ کرے تانکہ کاروبار کن کیش انا ویل ودی مف، داڑتون اوار اوار شاری تے نغد امداد نا فراوانی کن پروگرام اسے نا بناءِ کننگا تانکہ مشکل وخت اٹی اوفتے کن آسانی ودی کننگ مرے روزگار ءِ بچفنگ کن ہم سبسڈیز و پے رول خڑچ آتا رداٹ پروگرام اس درستی راستی کرفنگا۔ وزیراعظم نا سلاہکار پارے کہ نن سمجھنہ کہ کوویڈ۔ 19 آن ودی مروک آ حالیت و ویل آتے کم کننگ اٹ جہانی برادری نا کوشست آک المی ءُ، شون ہلوک و امداد تروک آ ملک آتا کنڈآن پدتموک و نزور زرگران تیکن وام تیٹی ریلیف دارداٹ اسہ دمدستی ریلیف نا گام اس پک مننگ کیک، پاکستان نا وزیراعظم عمران خان ہم دا رداٹ جہانی برادری و راہشون تیان تینا کڑد ءِ ادا کننگ کن پارینے، پاکستان پڑک 20 ملک آتا کنڈآن وام تا زرتس اٹ آسراتی و آئی ایم ایف، جہانی بینک، ایشیائی شونداری بینک و اقوام متحدہ نا ایلو ادارہ غاتا کنڈآن دمدستی کمکاری نا گام آتا ستاءِ کیک۔ وزیراعظم نا سلاہکار پارے کہ پاکستان نیدرلینڈ و افریقی یونین تون اواری اٹ ڈیبٹ ورنل ایبلیٹی پڑک نا شریک چیئرمین نا کڑد ءِ ادا کننگ ءِ، دا پڑک کیہی سلاہ و سلاہ و سوج تیا کاریم کننگ ءِ، اولیکو سلاہ دادے کہ پڑک 20 انا وام موخر و معطل کرفنگ نا گام گیج(ڈی ایس ایس آئی) نا کم آن کم اسہ سال انا مدمقرر کننگے، ہنداوڑ کیہی سلاہ ہم مون آ بسنے کہ کوویڈ۔ 19 آن زہمی پدتموک ملک آتاکریڈٹ ریٹنگ زہمی مف۔ پڑک 20 نا ملک آک کثیر الجہتی و شونداری بینک آتیان ہم دا عمل اٹ اوار مننگ کن پارینے ہرااسہ جوان ءُ گام اسے۔ جہانی بینک بروک آ 15 تُو اٹی 160 ارب ڈالر نا کمکاری نا پروگرام اس شین تسنے، دانا مناسب حصہ وام موخر ومعطل کرفنگ نا گام گیج(ڈی ایس ایس آئی) ٹی اوار مک آتیکن دستیاب مرے۔ اوپارے کہ نیامئی کٹیا کروک آ ملک آتا زرگزرانک ہم کوویڈ۔ 19 آن زہمی مسنو ، ڈی ایس ایس آئی ٹی دا ملک آتے ہم اوار کننگ المی ءِ۔ ڈیبٹ ورنل ایبلیٹی پڑک ایلو بشخ آتا ہم پیدواری ءِ کرینے ہراڑے کمکاری نا فراوانی المی ءِ، پڑک افریقی اقتصادی کمیشن نا اسہ سلاہ سیا ہم سجفنگ ءِ ہراٹی پائیدار بنداوتیا لیکویڈ ٹی انا فراوانی نا سفارش کننگانے نن سمجھنہ کہ داڑآن مون آ بروک آ منڈی تیٹی کم سود انا حامل وام تا فراوانی ٹی کمک رسینگک۔ ہنداوڑنا آسراتی کم کٹیا کروک ملک آتے فراوان کننگ نا ہم جاچ ءِ ہلنگے۔ وزیراعظم نا سلاہکار پارے کہ پدتموک و کم کٹیا والا ملک آتے مون تروک چیلنج آتون مون تننگ کن جہانی عزم و کمکاری نا گرج ءِ۔ اوپارے کہ کوویڈ۔ 19 نا رداٹ ننے نئے بیرہ زرکاری نا مقدار بلکن آب آہم چکار کروئی مریک۔
