اسلام آباد۔ 31 اگست (اے پی پی) وزیر داخلہ بریگیڈیئر(ر) اعجاز شاہ تون سعودی سفیر نواف بن سعید الملکی دوشنبے نادے آ داڑے وزارت داخلہ ٹی اوڑدہی کرے۔ وزارت داخلہ نا کنڈآن جاری بیان نا رداٹ سعودی سفیر وزیر داخلہ اعجاز احمد شاہ تون اونا ایلم نا کزیت آ ہڑزخواہی کرے و وارث آتا حق اٹی دعاکرے۔ اوڑدہی ٹی تین پہ تینی است خواہی نا باندات آتیا ہم گپ وتران کننگا۔ وزیر داخلہ اعجاز احمدشاہ کورونا نا حالیت وعمرہ کن جہاز آتے بحال کننگ نا بابت ہریفے ہراڑآ سعودی سفیر وزیر داخلہ ءِ معلومدار کرے کہ کوروناناحالیت آک گچین مننگ تون جہاز آک ملنگرہ۔ وزیرداخلہ پارے کہ سعودی عرب آن بیرہ حکومتی کہول آ آخا بلکن السی کہول آہم ایلمی تعلقداری ءِ۔ اوپارے کہ ہڑتوم آ ملک آتا نیام اٹ السی و حکومتی رابطہ غاک داخہ در سوگو ءُ کہ اوفتے گوجالنگ مفک۔ پاکستان و سعودی عرب اِراجون اسہ جان ءُ۔ بیان نارداٹ اوڑدہی نا ایسر داعہد تون مس کہ بروک آ دے تیٹی تین پہ تینی تعلقداری تے پین سوگو کننگک۔
