وزیراعظم عمران خان نا بڑزکو کہول انا دیوان آن تران

اسلام آباد۔ 31 اگست (اے پی پی) وزیراعظم عمران خان پارینے کہ کراچی نا الس نا مشکل آتیا خن تے تفنگ کپنہ، بنجاکراچی نا ویل آتا ایسری و شونداری کن تینا پبی کڑد ءِ ادا کیک، ہندا ہفتہ کراچی ٹرانسفارمیشن پلان ءِ حتمی دروشم اس تننگے۔ داخیال آتا درشانی ءِ او تینا کماشی ٹی کراچی نا ویل آتا آخبتی ایسری کن ’’کراچی ٹرانسفارمیشن پلان’’نا بابت بڑزکو کہولی دیوان آن تران کرسا کرے۔ دیوان اٹی وزیر ڈٹ بندی اسد عمر، وزیر بحری امور سید علی زیدی(ویڈیو لنک) گورنر سندھ عمران اسماعیل، چیئرمین این ڈی ایم اے لیفٹیننٹ جنرل محمد افضل، تعلقدار وزارت آتا سیکرٹری صاحب آک و سینئر آفیسر آک بشخ ہلکر۔ وزیراعظم ءِ قائد نا شارانا ویل، دیر، سیوریج، نالہ غاتا سفائی، سالڈویسٹ مینجمنٹ و ٹرانسپورٹ نا بابت الس ءِ مون تروک مشکل و اوفتا ویل آتا آخبتی ایسری کن سلاہ ئی‘‘کراچی ٹرانسفارمیشن پلان’’ آ سرجم حوال تسر۔ ‘‘کراچی ٹرانسفارمیشن پلان’’ کراچی نا ویل و پاکستان نا زرگزرانی حب انا شونداری گرج آتے مون آ تخسا ٹہیفنگانے۔ وزیراعظم کراچی نا ویل آتا بابت ہیت کرسا پارے کہ ملک انا شونداری کراچی نا شونداری تون گنڈوک ءِ۔ کراچی ٹی سال تیان مون تروک السی ویل آتا جوان سماءِ۔ الس نا مشکل آتیا خن تے تفنگ کپنہ۔ کراچی نا ویل آتا ایسری و شونداری کن بنجاتینا پبی کڑد ءِ اداکیک۔ وزیراعظم پارت کرے کہ غٹ اسٹیک ہولڈرآتا سلابت اٹ ہنداہفتہ‘‘کراچی ٹرانسفارمیشن پلان’’ ءِ حتمی دروشم اس تننگے تانکہ دانا باقاعدہ منظوری و عملدرآمد نا کاریم نا بناءِ کننگ مرے۔