اسلام آباد۔ 28 اگست (اے پی پی) وزیراعظم عمران خان پارینے کہ حکومتی کوشست و حکمت عملی نا سوب آن کورونا نا تالانی ءِ توننگانے، خطرہ داسکان ارے ہراڑتون مون تننگ کن مچ آ قوم انا کمک درکار ءِ، محرم الحرام اٹ رکھی گام گیج اختیار کننگ نا گرج ءِ، کراچی ٹی مروک آ بھس کاری و الس نا ویل آتا ایسری کن بنجائی حکومت صوبائی حکومت تون پورو کمک کیک، اسکول آتیٹی تعلیمی سرجزآتا بحالی نا بابت صوبائی حکومت اسکول آتاانتظامیہ و ایلو تعلقدار آتا سلابت اٹ غٹ بست وبند آتے حتمی دروشم اس تننگے۔ اوداخیال آتا درشانی ءِ جمعہ نادے آ داڑے نیشنل کوآرڈینیشن کمیٹی کوویڈ۔ 19 نا دیوان نا کماشی ءِ کرسا کرے۔ دیوان اٹی بنجائی وزیر ڈٹ بندی اسدعمر، بنجائی وزیر تعلیم و کسبی تربیت شفقت محمود، بنجائی وزیر ہوابازی غلام سرورخان، بنجائی وزیر اقتصادی امور مخدوم خسروبختیار، بنجائی وزیر صنعت و پیداوار محمد حماد اظہر، بنجائی وزیر غذائی رکھ و پٹ وپول سید فخرامام، وزیراعظم نا سلاہکار خزانہ ڈاکٹر عبدالحفیظ شیخ،وزیراعظم نا سلاہکار واپار عبدالرزاق داؤد، وزیراعظم نا خصوصی کمکار راجی آسراتی و تخفیف نیزگاری ڈاکٹرثانیہ نشتر، وزیراعظم ناسلاہکار جان جوڑی ڈاکٹر فیصل سلطان، وزیراعظم نا خصوصی کمکار حوالکاری و شینکاری لیفٹیننٹ جنرل (ر) عاصم سلیم باجوہ، وزیراعظم نا خصوصی کمکار قومی سلامتی ڈاکٹر معید یوسف، چیئرمین این ڈی ایم اے و ایلو سینئر آفیسر آک ساڑی ئسر وخت اس کہ وزیراعظم آزاد جموں و کشمیر راجہ فاروق حیدر خان و صوبائی وزیر اعلاک ویڈیولنک انا کمک اٹ دیوان اٹی بشخ ہلکر۔ دیوان اٹی محرم الحرام اٹی کورونا نا تالانی ءِ گچین وڑاٹ توننگ کن گام گیج، اسکول آتا تعلیمی سرجز آتا بحالی، ٹیسٹنگ، ٹریکنگ و کوارنٹین اسٹریٹجی آ عملدرآمد، چندی بشخ خاص کر سیل و سوات نا بابت ٹیسٹںگ نا حکمت عملی ، مائیکرو و سمارٹ لاک ڈاؤن و ہوائی بشخ انا بابت ساڑی حالیت آتے مون آ تخسا حکمت عملی آ سرجم حوال تننگا۔ وزیر ڈٹ بندی اسدعمر دیوان ءِ کورونا نا تالانی نا جم حالیت آتا بارواٹ سرجم وڑاٹ حوال تس۔ دا بابت او جہانی و علاقائی ملک و پاکستان نا حالیت آتا تقابلی جاچ ءِ پیش کرے۔ دیوان ءِ پاننگاکہ کورونا آن بچنگ نابرخلاف حکومت پاکستان نا کنڈآن اختیار کروک آ حکمت عملی نا جہانی کہول آ ستاءِ کننگ انگ ءِ۔ اللہ تعالیٰ نا فضل و کرم و حکومتی حکمت عملی نا سوب آن پاکستان اٹ پیشن نا دنیا و خاص کر ہمسایہ ملک آتا نسبت کورونا نا بابت حالیت آتیٹی پیدوار گچینی ءِ۔ دیوان ءِ پاننگاکہ گچین گام گیج آتا سوب آن کورونا پازیٹیویٹی ٹی خاطرخواہ کمتی واقع مسنے۔ دیوان ءِ محرم الحرام اٹی مجالس و جلوس آتا بابت اختیار کروک آ حکمت عملی و ایس او پی تیا عملدرآمد آ بریف کننگا۔ دیوان اٹی گچین حالیت آتا رداٹ اسکول آتیٹی تعلیمی سرجز اتا بحالی نا بابت روڈ میپ، اسکول آتیٹی رکھی بست وبند و ایس او پی تا بابت سرجم گپ وتران کننگا۔ وزیراعظم دیوان آن تران کرسا کورونا نا گچین حالیت آتیا این سی او سی، میڈیکل نا بشخ اتون گنڈوک بندغ، کانود نافذ کروک آ ادارہ، صوبائی حکومت و ایلو غٹ تعلقدار آتے مبارکبادی تس و پارے کہ گچین کوارڈینیشن و جامع حکمت عملی نا سوب کورونا نا برخلاف سرسہبی نصیب مس۔ اومستی پارے کہ حکومتی کوشست و حکمت عملی نا سوب کورونانا تالانی ءِ توننگاولے داسکان خطرہ ارے ہراڑکن مچ آ قوم اناکمک درکارءِ۔ محرم الحرام اٹی کورونا نا تالانی ءِ توننگ نا رداٹ وزیراعظم ماسک و ایلو رکھی گام گیج اختیار کننگ نا گرج آ خاص وڑاٹ زور شاغا۔ محرم الحرام اٹی کمکاری آ وزیراعظم عالم دین، ذاکرین و مذہبی راہشون تا کنڈآن کمکاری آ خصوصی منت واری ءِ ہرفسا پارے کہ مذہبی راہشونک کورونا نا برخلاف جنگ اٹ ہراکمک نا درشانی ءِ کرینو او ستاکڑزک۔ وزیراعظم وزیراعلیٰ سندھ آن کراچی نا حالیت آتیا خصوصی وڑاٹ ہیت کرسا پارے کہ کراچی ٹی مروک آ بھسکاری و داٹی الس ءِ مون تروک ویل آتا ایسری نا چرجوئی ٹی بنجائی حکومت صوبائی حکومت تون ہروڑاٹ کمک کیک و دارداٹ غٹ بنجائی ادارہ غاتے پارت جاری کننگانے کہ او ریلیف سرجز آتیٹی صوبائی حکومت تون پبی کمک کیر۔ اوبروک آ منہ دے اٹی تینٹ کراچی آ کاہک و حالیت آتاجاچ ءِ ہلیک۔ اسکول آتیٹی تعلیمی سرجزآتا بحال کننگ نا بابت ہیت کرسا وزیراعظم پارت کرے کہ دا رداٹ صوبائی حکومت، اسکول آتا انتظامیہ و ایلو تعلقدار آتا سلابت اٹ غٹ بست وبند آتے حتمی دروشم اس تننگے تانکہ 15 ستمبر آ اسکول آتیٹی تعلیمی سرجزآتا بحالی نا بابت ہفت ستمبر نا دیوان اٹی حتمی فیصلہ ہلنگ مرے۔ دیوان اٹی کورونا نا گچین حالیت آتے مون آ تخسا ملک انا تہہ ٹی ہوائی سفر نا بابت ہیلتھ پروٹوکول آتا جاچ ءِ ہلنگ نا فیصلہ ءِ کننگا۔
