کورونا وائرس نا بابت باندات و تعلیمی ادارہ غاتیٹی تعلیمی سرجز آتا بناءِ کننگ نا میکنزم نا جاچ ءِ ہلنگا، اہم فیصلہ غاتا منظوری
کوئٹہ۔ 28 اگست (اے پی پی) وزیراعلیٰ بلوچستان جام کمال خان نا کماشی ٹی اڈ ہلوک آ اسہ بڑزکو کہولی دیوان اسے ٹی کورونا دین انا بابت باندات و تعلیمی ادارہ غاتیٹی تعلیمی سرجزآتا بناءِ کننگ نا میکنزم نا جاچ ءِ ہلسا دابابت گڑاس فیصلہ غاتا منظوری ءِ تننگا۔ دیوان اٹی محکمہ جان جوڑی و محکمہ انفارمیشن ٹٛیکنالوجی ءِ کورونا وائرس نا ٹیسٹنگ و کوروناآن زہمی بندغ آتا تعلقدار آتا ٹریننگ و ٹریسنگ نا وڑوڈول ءِ پین گچین و سوگو کننگ نا پارت کننگا۔ وزیراعلیٰ داوخت آدفتر، دوکان و ہوٹل آتیٹی کورونا وائرس نا رکھی گام گیج آتا ایس او پی تیا عملدرآمد نا جاچ ءِ ہلنگ کن سوالنامہ اس تیار کرسا دا ہند آتیا خلنگ نا پارت کرے تانکہ ہُننگ مرے کہ السی ہند آتیا ہراحداسکان ایس او پی تیا عمل کننگ انگ ءِ ، دیوان اٹی پرائمری کہول آ ہائر ایجوکیشن اسکان تعلیمی ادارہ غاتیٹی تعلیمی سرجز آتا بناءِ کننگ نا بابت باندات نا ہر پلو آن سرجم جاچ ءِ ہلسا دا بابت دیوان اٹی ساڑی پبلک ہیلتھ چاہندار و سینئر ڈاکٹر آتیان اوفتا سلاہ ءِ ہلنگا و اسہ جامع میکنزم اسے نا تیارآن امنا کننگا۔ ہرانا رداٹ چنا و استاد آتے ہرحد اسکان کورونا نا زہم تیان رکھ کننگ مرے۔ وزیراعلیٰ پرائمری، مڈل و ہائی اسکول و کالج و یونیورسٹی تیکن رکھی ایس او پی تا گائیڈ لائن نا تیاری کن جان جوڑی، انفارمیشن ٹیکنالوجی، تعلیم نا محکمہی غاتا سیکرٹری و وزیراعلیٰ ڈلیوری یونٹ آتالان کمیٹی اس جوڑ کرسا اودے چار دے انا تہہ ٹی سلاہ و سوج آتا تیاری نا ٹاسک تس۔ کمیٹی ٹی نجی اسکول و مدرسہ غاتا نمائندہ غاتے ہم اوار کننگک۔ صوبائی وزیر داخلہ میر ضیاء لانگو، چیف سیکرٹری بلوچستان فضیل اصغر، آئی جی پولیس محسن حسن بٹ و تعلقدار محکمہ غاتا سیکرٹری و ایلو کمامدارآک دیوان اٹی بشخ ہلکر۔
