اسلام آباد۔ 28 اگست (اے پی پی) پاکستان منرل ڈویلپمنٹ کارپوریشن نا منیجنگ ڈائریکٹر فرحان شفیع بنجائی وزیر توانائی عمر ایوب خان تون اوڑدہی کرسا وزیراعظم ءِ کورونا ریلیف فنڈاکن 5 ملین روپئی نا چیک اس پیش کرے۔ دا عطیہ ٹی پی ایم ڈی سی نا غٹ ملازم آتا اِرادے انا تنخواہ ہم اوار ءِ۔ جمعہ نادے آ مروک آ اوڑدہی ٹی وزیر عمر ایوب پارے کہ پٹرولیم ڈویژن و اوڑتون وابستہ تنظیم/کمپنیک وقومی جوزہ اتون کورونا ریلیف سرجزآتیٹی نمان بشخ ہلکر۔ ترجمان پٹرولیم ڈویژن نا کنڈآن جاری بیان نارداٹ داکان مست، سوئی ناردرن گیس پیپ لین لمیٹڈ کمپنی 38 ملین روپئی و سوئی سدرن گیس کمپنی 30 ملین روپئی نا زر کورونا ریلیف فنڈ اکن جتا کریسر سوئی نادرن کمپنی بورڈ پارت کرے کہ او 19 ملین روپئی ءِ دینی مرض اکن وزیراعظم نا ریلیف فنڈ اٹ جمع کے و طبی گڑاتا ہلنگ کن 19 ملین روپئی این ڈی ایم اے ءِ فراوان کے۔ اوجی ڈی سی ایل، آئل اینڈ گیس ڈویلپمنٹ کمپنی لمیٹڈ 53 ملین روپئی نا زر وزیراعظم ریلیف فنڈ اٹ جمع کرفے۔ داکان بیدس آئی 9 اسلام آباد اٹی اوجی ڈی سی ایل نا ہاسٹل ہم ضلعی انتظامیہ نا اختیار اٹ تننگاسس۔ اوجی ڈی سی ایل میڈیکل اسٹاف کن دوائی، پی پی ای کٹ، کُننگ نا گڑاہم تس و قرنطین نا گرج آتیکن ایمبولینس عطیہ کرے۔ پاکستان پٹرولیم لمیٹڈ(پی پی ایل) کورونانا المی گڑاتا ہلنگ کن سندھ انا ضلعی حکومت ءِ 10ملین روپئی نا نغد زر تس۔ پاکستان اسٹیٹ آئل(پی ایس او) وزیراعظم نا ریلیف فنڈ اٹی 50ملین روپئی جمع کرفے۔
