اسلام آباد۔ 28 اگست (اے پی پی) بین الپارلیمانی یونین نا صدر گیبریلاکیویس بیرن جمعہ نادے آ کوہسار مری نا دورہ ءِ کرے۔ سینیٹ سیکرٹریٹ نا کنڈآن جاری بیان نارداٹ بین الپارلیمانی یونین نا صدر چیئرمین سینیٹ نا سلہ غا پاکستان نا دورہ ءِ کننگ ءِ۔ چیئرمین سینیٹ محمد صادق سنجرانی، بنجائی وزیر حوالکاری سینیٹر شبلی فراز، سینیٹر مرزامحمد آفریدی و سینیٹر دلاور خان ئسک ہم اوڑتون اوارئسر۔ بین الپارلیمانی یونین نا صدر لاہور و گوادر نا دورہ ءِ کرینے۔ پاکستان نا دودوربیدہ، ومہمانداری آن زہمی مسنے۔ بین الپارلیمانی یونین نا صدر پاکستان نا دودوربیدہ و مہمانداری آ خصوصی سفرنامہ اس نوشتہ کننگ نا ہم فیصلہ ءِ کرینے۔ چیئرمین سینیٹ محمد صادق سنجرانی و صدر بین الپارلیمانی یونین گیبریلاکیویس بیرن وزیراعظم پاکستان نا شجرکاری مہم نا بابت مری گورنر ہاؤس اٹ نیال اس خلک۔ صدر آئی پی یو چیئرمین سینیٹ تون اوار مال روڈ آ چہل گامی ہم کرے و سیل و سواتی تتون ملا۔ داوخت آ صدر آئی پی یو پارے کہ پاکستان قدرتی ندارہ و سیل و سواتی ہند آتیان شُپ ءِ۔ مچ آ دنیا نا سیل و سواتیک پاکستان نا سیل و سواتی ہند آتیان لطف اندوز مننگ کیرہ۔ صدر بین الپارلیمانی یونین پاکستان نا دودوربیدہ، کلچرل و ہینڈی کرافٹ نا ستاءِ کرے۔ اوپارے کہ پاکستان نا الس مہماندار و مہرومریبت کروک ءُ۔
