اسلام آباد۔ 28 اگست (اے پی پی) وزیراعظم عمران خان پارینے کہ سندھ خاص وڑاٹ کراچی نا الس نا شونداری گرج و مون تروک ویل آتا جوان سماءِ و بنجائی حکومت دا بابت تینا کڑد ءِ ادا کیک۔ وزیراعظم آفس نا میڈیا ونگ آن جاری بیان نا رداٹ داخیال آتا درشانی ءِ او تینا کماشی ٹی کراچی ٹی بنجائی حکومت نا کنڈآن چندی شونداری ڈٹ آتیا پیش رفت نا جاچ دیوان آن تران کرسا کرے۔ دیوان اٹی بنجائی وزیر اسد عمر، مراد سعید و سینئر آفیسر آک ساڑی ئسر و گورنر سندھ عمران اسماعیل کراچی آن ویڈیو لنک انا کمک اٹ بشخ ہلک۔ دیوان ءِ صوبہ سندھ و کراچی ٹی بنجائی حکومت نا شونداری ڈٹ آتیا داتم اسکان نا پیش رفت نا سرجم جاچ ءِ پیش کننگا۔ گورنر سندھ وزیراعظم ءِ کراچی نا تازہ انگا حالیت آتا بارواٹ بریف کرے۔ وزیراعظم دیوان آن تران کرسا پارے کہ صوبہ سندھ و خاص کر کراچی نا الس نا شونداری گرج و مون تروک ویل آتا جوان سماءِ۔ و بنجائی حکومت دا بابت تینا کڑد ءِ ادا کیک۔ وزیراعظم پارے کہ کراچی ٹی سیوریج، نکاسی آب و کنوئی آ ساف دیر انا فراوانی نا بابت جامع پلان، غٹ اسٹیک ہولڈر آتا سلابت اٹ ٹہیفنگ انگ ءِ۔ اوپارے کہ کراچی نا الس ءِ ریلیف تننگ کن غٹ بنجائی ادارہ غاتے پارت تننگانے۔ اوپارے کہ تدوک آ وزیراعلیٰ سندھ اتون کراچی ٹی ساڑی آ پِرتیان پد انا حالیت آتیا گپ وتران مس و بنجا و اونا ادارہ غاتا کنڈآن ہروڑنا کمک کننگ نا باوری کرفنگانے۔ وزیراعظم زور شاغا کہ کراچی پاکستان نا اہم انگا شار ءِ و داوخت آ مون تروک ہلہلہ ئی حالیت آتون مون تننگ کن غٹ وسیلہ غاتے کاریم اٹ اتنگک۔
