اسلام آباد۔ 28 اگست (اے پی پی) صدر مملکت ڈاکٹر عارف علوی پاکستان پوسٹ ءِ 45 دے انا تہہ ٹی معذور ریٹائرڈ ملازم نا مارءِ بھرتی کننگ نا پارت کرینے۔ جمعہ نادے آ ایوان صدر نا میڈیا ونگ آن جاری کروک بیان نا رداٹ سکھر نا ہنکینی، محمد شاہد پاکستان پوسٹ آفس ڈیپارٹمنٹ نا کنڈآن معذور ملازم آتا کوٹہ غا مار انا تقرری نا درخواست وئی نا زیات مننگ نا بہانہ غا مسترد کننگ آ بنجائی محتسب اٹ غاو جمع کرفیسس۔ صدر مملکت ڈاکٹر عارف علوی نا چنکو عذر اسے آ باندات ءِ پیچیدہ کننگ و ملازمت تفننگ آ محکمہ غا ترند مسنے۔ صدر مملکت باندات ءِ ایسر کننگ اٹ تاخیر آ ناراضگی نا درشانی ءِ کرے۔ صدر مملکت ڈاکٹر عارف علوی پارے کہ اسہ چنکوعذر اسے آ اسہ معذور بندغ اسے نا باندات ءِ پیچیدہ کننگ است ہسونی نا سوب ءِ، معذور بندغ نا برخلاف بریبر ہُپننگ کون آ نامناسب رویہ غاتا بایدے حوصلہ شکنی ءِ کننگے، صدر مملکت پوسٹ آفس ڈیپارٹمنٹ ءِ معذور ملازم آتا چناتے تروک آ نوکری تا سرجم آتے فراوان کننگ نا پارت کرینے۔ صدر مملکت ڈاکٹر عارف علوی پارے کہ ریٹائرڈ ملازم آتا چناتا روزگار نا بابت بنجائی حکومت نا پالیسی انسانی ہمدردی نا رداٹ بناکننگا ہرادے ہندا جوزہ اٹ نافذ کننگ نا گرج ءِ۔ صدر مملکت ڈاکٹر عارف علوی بنجائی محتسب نا فیصلہ نا برخلاف پاکستان پوسٹ آفس نا درخواست ءِ مسترد کرے۔
