اسلام آباد۔ 28اگست (اے پی پی) بنجائی وزیر اقتصادی امور مخدوم خسروبختیار پارینے کہ پاکستان جاپان تون تعلقداری تے قدر انا نظر اٹ ہرک و اومیت ءِ کہ ہڑتوم آ ملک آتا نیام اٹ خاص وڑاٹ برآمدی و درآمدی گیگ بدل صنعت و قدرتی آفت آتون مون تننگ نا انتظام و انصرام تون اوار غٹ بشخ آتیٹی تعلقداریک پین مون آکارہ۔ اوداہیت ءِ پاکستان اٹ جاپان نا سفیر مستوداکونی نوری تون اوڑدہی ٹی گپ وتران کرسا پارے۔ اوڑدہی ٹی ہڑتوم آ ملک آتا نیام اٹ ہڑتوم آ کنڈآتا سفارتی، واپاری و اقتصادی تعلقداری تے ودفنگ نا بابت باندات آ گپ وتران کننگا۔ بنجائی وزیر پارے کہ پاکستان نا حکومت و الس جاپان نا کنڈآن اسلام آباد میٹروپولیٹن کارپوریشن نا ویسٹ مینجمنٹ کن 7.4 ملین ڈالر نا مشینری نا فراوانی نا ستاءِ کیرہ، اومشکل وخت اٹی جاپان نا کنڈآن انسداد کورونا کن کمک فراوان کننگ آ جاپان نا منت واری ءِ ہم ہرفے و پارے کہ جاپان نا کنڈآن پاکستان اٹ توانائی، ٹرانسپورٹ، صنعت و راجی شونداری نا بشخ آتیٹی کمکاری قابل ذکر ءِ۔ اوجاپان نا کنڈآن کراچی ٹی اربن فلڈ مینجمنٹ کن تیکنیکی کمکاری نا ہم ستاءِ کرے۔ بنجائی وزیر جاپان نا سفیر ءِ چندی بشخ خاص کر تعمیراتی صنعت و مینو فیکچرنگ نا بشخ ءِ شونداری و ترغیب تننگ نا رداٹ حکومت نا کنڈآن کروک آ گام گیج آتیان معلومدار کرے و پارے کہ حکومت تعمیراتی و مینو فیکچرنگ بشخ ءِ مون آ دننگ ءِ و دارداٹ جاپانی کمپنیک چندی شونداری بشخ آتا مون آ دننگ کن پاکستان نا حکومت نا کنڈآن درستی راستی کرفوک رعایتی اسکیم تیان فائدہ ہرفنگ کیرہ۔ جاپان نا سفیر پارے کہ اونا ملک پاکستان تون واپاری تعلقداری تے ودفنگ نا خواہندار ءِ۔ اوپارے کہ جاپان پاکستان تون قدرتی آفت آتیان بچنگ و آبادکاری نا بشخ اٹ کمکاری ءِ ودفنگ خواہک، اوڑدہی ٹی کڑدہ غاک ہڑتوم آ ملک آتا تین پہ تینی فائدہ غاتیکن کورونا نا دین آن پد انا دور اٹی واپار و اقتصادی تعلقداری تے پین مون آ دننگ نا عزم انا درشانی ءِ کریر۔
