اسلام آباد۔ 28 اگست (اے پی پی) فیڈرل بورڈآف ریونیو(ایف بی آر) پاکستان کسٹمز ءِ کنوئی آ گڑاتا اسمگلنگ نا توننگ ءِ پک کننگ کن گام گیج کننگ نا پارت کرینے۔ ترجمان ایف بی آر جمعہ نادے آ پارے کہ فیڈرل بورڈ آف ریونیو ڈائریکٹوریٹ جنرل آف انٹیلی جنس اینڈ انویسٹی گیشن کسٹمز اسلام آباد، چیف کلکٹر کسٹمز بلوچستان کوئٹہ و چیف کلکٹر کسٹمز نارتھ اسلام آباد ءِ وزیراعظم پاکستان نا پرمان تا تعمیل اٹ کنوئی آ گڑاتا ملک آن پیشن اسمگلنگ نا توننگ ءِ پک کننگ کن پارت جاری کرینے۔ وزیراعظم داپرمان تے خولم، نُت، بورہ، مکئی، میدہ، پولٹری، میوہ، سوزی و ساہدار تا ملک اٹی ودی مروک آ کمتی آن پد جاری کرینے۔ ترجمان پارے کہ بنجائی حکومت اسمگلنگ نا توننگ کن کوویڈ۔ 19 اسمگلنگ توننگ آرڈیننس 2020ءِ ہم درستی راستی کرفینے تانکہ کانود نافذ کروک آ ادارہ غاتے واکدار کرسا اسمگلنگ نا توننگ ءِ پک کننگ مرے۔ ایف بی آر مستی پارت جاری کرسا پارے کہ پاکستان کسٹمز اسمگلنگ خاص کر کنوئی آ گڑاتا اسمگلنگ ءِ کنٹرول کننگ کن غٹ وسیلہ غاتے کاریم اٹ اتے و ایلو کانود نافذ کروک آادارہ غاتون اواری اٹ برآمدی گڑاتا کلیرنس ناوخت ہُشار مرے۔ ایف بی آر ہر پانزدہ دے آن پد ڈائریکٹوریٹ جنرل آف انٹیلی جنس اینڈ انویسٹی گیشن کسٹمز اسلام آباد، چیف کلکٹر کسٹمز بلوچستان، کوئٹہ و چیف کلکٹر کسٹمز نارتھ اسلام آباد ءِ چست کروک آ گام گیج آتیان ایف بی آر ہیڈ کوارٹر ءِ معلومدار کننگ نا پرمان ہم جاری کرینے۔
