اسلام آباد۔ 28 اگست (اے پی پی) چیئرمین سینیٹ محمد صادق سنجرانی پارینے کہ شمسی توانائی و قابل تجدید توانائی نا ڈٹ آتیان بلوچستان نا بجلی نا گرج آک پورو مننگ کیرہ، بلوچستان اٹی قابل تجدید توانائی نا ڈٹ آتیکن خصوصی آسراتی تننگے۔ بنجائی وزیر توانائی عمر ایوب چیئرمین سینیٹ محمد صادق سنجرانی تون جمعہ نادے آ پارلیمنٹ ہاؤس اٹی اوڑدہی کرے ہراٹی چیئرمین سینیٹ بلوچستان اٹی توانائی تون تعلقدار ڈٹ و بلوچستان نا بجلی نا فراوانی نا نظام ءِ گچین کننگ نا بابت پارت کرے۔ چیئرمین سینیٹ پارے کہ بلوچستان اسہ بھلو صوبہ سے۔ بجلی نا بشخنگ نا نظام ءِ گچین کروئی مریک۔ بلوچستان نا ضلع چاغی، لسبیلہ، آواران، وشوک، گوادر پین پین کن جتا بجلی نابشخوک ءُ کمپنی اس جوڑ کننگ نا گرج ءِ۔ چیئرمین سینیٹ محمد صادق سنجرانی پارت کرے کہ لسبیلہ ءِ کے الیکٹرک آن جتا کرسا پوسکن آ سلاہ ئی بشخوک آ کمپنی ٹی اوار کننگے۔ اوپرے کہ بلوچستان قدرتی وسیلہ غاتیان شُپ ءِ و شمسی توانائی و قابل تجدید توانائی نا ڈٹ آتیان بلوچستان نا بجلی نا گرج پورو مننگ کیک۔ محمد صادق سنجرانی پارے کہ بلوچستان اٹی قابل تجدید توانائی نا ڈٹ آتیکن خصوصی آسراتی تننگے۔ توانائی نا پوسکن آ ذریعہ غا خاص چکار کننگے۔ اوپارے کہ بلوچستان نا مر مر انگا علاقہ غاتیٹی بجلی نا نظام جوان وڑاٹ کاریم کپننگ ءِ اودے گچین کننگے و اولیتی بنداو تیا بلوچستان نا السءِ مون تروک مشکل آتا ایسر اس کشنگے۔ چیئرمین سینیٹ پارے کہ ہر ضلع ٹی چنکا کچ انا توانائی ڈٹ آتیان گچینی بننگ کیک۔
