اسلام آباد۔ 28 اگست (اے پی پی) بنجائی وزیر امور کشمیر و گلگت بلتستان علی امین خان گنڈاپور پارینے کہ ترک صدر طیب اردوان کشمیر نا ویل آ مدام پیدوار موقف ءِ تینا کرینے۔ کشمیر نا ویل آ پدریسہ مخ تفی آ ترک حکومت و الس نا منت واری ءِ ہرفنہ، ترکی و پاکستان نا نیام اٹ دہائی تیا متکن آ برادرانہ تعلقداری پین سوگو مننگ ءِ، گلگت بلتستان اٹی سیل و سوات نا بشخ اٹی پیشن نا زرکاری نا گچین وارخواہی ساڑی ءِ، ترک زرکار آک گلگت بلتستان اٹی زرکاری آن بے حد فائدہ ہرفنگ کیرہ، ہر سال کم و ود 20 لکھ ہندی سیل و سواتی گلگت بلتستان آ بریرہ۔ داخیال آتا درشانی ءِ او ترک کوآپریشن اینڈ کوآڈیشن ایجنسی نا کنٹری ہیڈ مسٹر گوخان امت تون اوڑدہی ٹی کرے۔ اوڑدہی ٹی ہڑتوم آ ملک آتا نیام اٹ جوڑ برادرانہ تعلقداری آ سرجم گپ وتران مس و چندی بشخ آتیٹی ہڑتوم آ ملک آتا نیام اٹ برجا کمکاری نا بابت باندات آتا جاچ ءِ ہلنگا۔ اوڑدہی ٹی بنجائی وزیر پارے کہ ترک صدر طیب اردگان کشمیر نا ویل آ مدام پیدوار موقف ءِ تینا کرینے۔ کشمیر نا ویل آ پدریسہ مخ تفی آ ترک حکومت و الس نا منت واری ءِ ہرفنہ۔ ترکی و پاکستان نا نیام اٹ دہائی تیا متکن برادرانہ تعلقداری پین سوگو مننگ ءِ۔ اوپارے کہ گلگت بلتستان اٹ سیل و سوات نا بشخ اٹی پیشن نا زرکاری نا گچین وارخواہی ساڑی ءِ۔ ترک زرکار آک گلگت بلتستان اٹی زرکاری آن بے حد فائدہ ہرفنگ کیرہ۔ اوپارے کہ ہر سال کم و ود 20 لکھ ہندی سیل و سواتی گلگت بلتستان آ بریرہ۔ گلگت بلتستان اٹی ہوٹلنگ و سیل و سوات نا آسراتی فراوان کرسا پیشن نا زرکارآک فائدہ ہرفنگ کیرہ۔ گلگت بلتستان اٹی پاکستان نا اکنامک حب جوڑ مننگ والا ءِ۔ اکنامک زون آن گلگت بلتستان اٹی صنعتی شونداری نا پوسکن ءُ کسر ملنگک۔ ترک حکومت گلگت بلتستان و صوبہ خیبر پختونخوا نا سویلی پسماندہ علاقہ غاتا شونہالی ٹی اہم کڑد ادا کننگ کیک۔ اوڑدہی ٹی ترک کوآپریشن اینڈ کوآرڈیشن ایجنسی نا کنٹری ہیڈ مسٹرگوخان امت پارے کہ سوشل سیکٹر، خاص وڑاٹ جان جوڑی و تعلیم نا بشخ اٹی پاکستان تون اواری اٹ کاریم کننگ اُن۔ پاکستانی الس نا شونہالی کن سوشل سیکٹر اٹی کمکاری کن ہروخت تیار اُن۔ اوپارے کہ ترک زرکارآتا پاکستان اٹی زرکاری نا بابت خصوصی است بڈی ءِ کننگ اُن۔ آخبت اٹ ہڑتوم آ ملک آتا نیام اٹ کمکاری ٹی پین ودکی مریک۔
