اسلام آباد۔ 28 اگست (اے پی پی) اینخو مالی سال جولائی 2020ء ٹی پاکستان اٹی کروک آ براہ راست درملکی زرکاری(ایف ڈی آئی) ٹی 61 درسد ودکی مسنے۔ اسٹیٹ بینک آف پاکستان (ایس بی پی) نا رپورٹ نا رداٹ جاری مالی سال اٹی جولائی 2020ء ٹی ملک اٹی 114.3ملین ڈالر نا براہ راست درملکی زرکاری کننگا وخت اس کہ جولائی 2019ء ٹی ایف ڈی آئی نا کچ 71.1 ملین ڈالر مسوسس۔ ہنداوڑ جولائی 2019 ء نا مقابلہ ٹی جولائی 2020ء ٹی ملک اٹی کروک آ ایف ڈی آئی نا کچ اٹی 43.2 ملین ڈالر یعنی 61 درسد نا نمان ودکی ریکارڈ کننگانے۔ ایس بی پی نا رداٹ جولائی 2020ء ٹی چین نا کنڈآن غٹ آن زیات 27 ملین ڈالر نا زرکاری کننگانے وخت اس کہ مالٹانا زرکار آک 18.5 ملین ڈالر و ہالینڈ 18.2 ملین ڈالر نا براہ راست درملکی زرکاری کرینے۔ اقتصادی چاہندار آک پارینو کہ کووڈ۔ 19 نا جہانی تنکی ٹی ملک اٹی اسہ تُو اٹی 114 ملین ڈالر نا درملکی زرکاری است بڈءِ ہراڑآن پاکستان اٹ درملکی زرکارآتا است خواہی نا ڈیک مریک۔
