اسلام آباد۔ 27 اگست (اے پی پی) وزیر خارجہ مخدوم شاہ محمود قریشی پارینے کہ سیکولر بھارت نا مخ تف، بھارت نا ہندو توا پالیسی تا سوب اینو سراپا برانز ءُ، سعودی عرب نا نائب وزیر خارجہ عادل الجبیرنا فلسطین نا بابت بیان ستاکڑزک، ہراغٹ قیاس آرائی تے چٹفینے۔ او پنچ شنبے نادے آ وزارت خارجہ ٹی مسکوہی خارجہ سیکرٹریز نا سلابتی دیوان نا کماشی ءِ کریکہ۔ دیوان اٹی بھارتی غیر کانودی مقبوضہ جموں و کشمیر اٹی برجا بھارتی جارحیت، اوغان امن عمل و ڈیہہ ٹی امن و ایمنی نا حالیت آتیا گپ وتران کننگا۔ وزیر خارجہ پارے کہ بھارتی غیر کانودی مقبوضہ کشمیر نا کودک شاریک تدوک آ اسہ سال آن بدترین کرفیو تون مون تننگ ءُ۔ سیکولر بھارت نا حامی، اینو بھارت نا ہندوتوا پالیسی تا سوب آن سراپا احتجاج ءُ۔ اوپارے کہ بھارت تینا داخلی انتشار آن چکار ءِ اسہ کنڈ کننگ کن ایل او سی نا پدریسہ خلاف ورزی ءِ کرسا کودک شاری تے شست کننگ ءِ۔ وزیر خارجہ دیوان اٹی بشخ ہلوک آتے اوغان طالبان آتون مروک آ اوڑدہی و اوغان امن عمل نا بابت داتم اسکان مروک آ پیش رفت آن ہم معلومدار کرے۔ دیوان اٹی متحدہ عرب امارات و اسرائیل نا نیام اٹ پک مروک ساڑی معاہدہ، و دے ٹکی نیامی نا حالیت آتیا ہم شرہ کننگا۔ وزیر خارجہ پارے کہ سعودی عرب نا نائب وزیر خارجہ عادل الجبیر نا فلسطین نا بابت مون آ بروک آ بیان ستاکڑزک۔ سعودی عرب نا فلسطین نا بابت بیان میڈیا ٹی مروک آ قیاس آرائی تے چٹفینے۔ وعزیر خارجہ دیوان اٹی بشخ ہلوک آتے تینا ساڑی دورہ چین و چینی ہم منصب تون مروک آ اوڑدہی ٹی سرجم آتیان ہم معلومدار کرے وپارے کہ پاکستان اوغان امن عمل تون اوار ڈیہہ ٹی امن و سوگوی کن مخلصانہ کڑد ادا کرسا کیک۔ مسکوہی خارجہ سیکرٹریز اوغان امن عمل کن پاکستان نا خیرخواہی کوشست و سرسہب دورہ چین آ وزیر خارجہ ءِ مبارکبادی تسر۔ دیوان اٹی اہم خارجہ پالیسی باندات آ سلابتی چرجوئی ءِ پدریسہ برجاتخنگ آ امنا کننگا۔
