نصرت شہباز، رابعہ شہباز و جویریہ شہباز نا بٹنگ نا سمن جاری، احتساب عدالت لاہور کیس انا مستی سماعت ءِ 10 ستمبر اسکان پد بٹے
لاہور۔ 27 اگست (اے پی پی) احتساب عدالت لاہور مسلم لیگ (ن) نا صدر و مسکوہی وزیراعلیٰ پنجاب شہباز شریف و اونا خاہوت نا برخلاف منی لانڈرنگ و کٹیاغان زیات میرات ریفرنس اٹی سلمان شہباز و ہارون یوسف عزیز نا وارنٹ دزگیری و نصرت شہباز، رابعہ شہباز و جویریہ شہباز نا بٹنگ انگ نا سمن جاری کرسا کیس انا مستی سماعت ءِ 10 ستمبر اسکان پد بٹے، عدالت بروک آ سماعت آ گواہ تے بیان قلمبند کرفنگ کن بٹنگا۔ احتساب عدالت نا جج جواد الحسن شہباز شریف خاہوت نا برخلاف منی لانڈرنگ ریفرنس آ سماعت کرے۔ پنچ شنبے نادے آ عدالتی سماعت آ شہباز شریف پیش مس وخت اس کہ حمزہ شہباز و ایلو دوبہ دار آتے زندان آن اتسا پیش کننگا۔ شہباز شریف کمرہ عدالت اٹ کرپشن نا غٹ دوبہ غاتے دروغ و سٹی گوندا۔ فاضل جج شہباز شریف ءِ مخاطب کرسا پارے کہ عدالت کانود نا رداٹ بھاز خوڑتی اٹ غٹ دوبہ غاتا جاچ ءِ ہلیک، بے گناہی پک مننگ نا حالیت اٹ او بَری مریرہ۔ نیب پراسیکیوٹر عدالت ءِ پارے کہ ریفرنس اٹی شہباز شریف، حمزہ شہباز، سلمان شہباز تون اوار 16 دوبہ دار پندار ءُ ہرافتیا 7 ارب آن زیات نا منی لانڈرنگ نا دوبہ ءِ وخت اس کہ 4 وعدہ معاف گواہ ہم اوار ءُ، نیب پراسیکیوٹر عدالت ءِ معلومدار کرے کہ شہباز نا مار سلمان شہباز، اُرائی نصرت شہباز و ہڑتوم آ مسنک رابطہ عمران و جویریہ علی انویسٹی گیشن ءِ جوان کتنو۔ عدالت ءِ پاننگاکہ شہباز شریف خاہوت نا برخلاف منی لانڈرنگ و غیرکانودی میرات آتا دوبہ غاتیا جاست وپاست برجاءِ۔ شہباز شریف تینا زائیفہ غاتا پن آ میرات جوڑ کرینے، شہباز شریف خاہوتی جائیداد آتا ذریعہ ءِ پاننگ اٹ بے سہب مسنے، منی لانڈرنگ ایکٹ و فنانس ایکٹ نا رداٹ جائیداد آتا ذریعہ ءِ پاننگ المی ءِ، شہباز شریف خاہوت آن جائیداد آتا بابت وار وار آ ورندی خواہنگا، شہباز تون اوار اونا خاہوت ورندی تننگ اٹ بے سہب مسنو، شہباز شریف تون اوار ایلوفتا میرات آتے کانود نا رداٹ منجمد کننگانے۔ عدالت پیش مفننگ آ شہباز شریف نا سالم ہارون یوسف عزیز و مار سلمان شہباز نا وارنٹ دزگیری جاری کرے وخت اس کہ نصرت شہباز، رابطہ شہباز و جویریہ شہباز نا بٹنگ نا سمن ہم جاری کرے۔ داکان بیدس عدالت شہباز شریف خاہوت نا میرات آتے منجمد کننگ نا برخلاف دائر درخواست آتیا ہم سماعت ءِ 10 ستمبر اسکان پدبٹے۔
