اسلام آباد۔ 27 اگست (اے پی پی) بنجائی وزیر امور کشمیر و گلگت بلتستان نا کماشی ٹی بڑزکو کہول انا دیوان اسے ٹی کشمیر اسٹیٹ پراپرٹی نا میرات آتا بابت سرجم حوال تننگا۔ کشمیر اسٹیٹ پراپرٹی نا میرات آتا رکھ اولین فرض ءِ۔ داوخت آ علی امین گنڈاپور پارے کہ میرات آتا رکھ و اوفتا گچین کاریم اٹ اتنگ کن ہرحد اسکان کانہ۔ مستین اٹی کشمیر اسٹیٹ پراپرٹی نا میرات آتا بابت مجرمانہ ڈیوالائی نا درشانی ءِ کننگا۔ کشمیر اسٹیٹ پراپرٹی نا آفیسر ءِ بیدادی نا شست کروک آ زموار آتے اوفتے اوفتا کروک نا سزا تننگک۔ علی امین گنڈاپور پارے کہ تدوک آ مالی سال اٹی کشمیر اسٹیٹ پراپرٹی نا کٹیا ٹی پیدوار ودکی مسنے، گچین مینجمنٹ آن کٹیا ٹی پین ودکی کننگ مریک۔ علی امین گنڈاپور کمامدارآتے پنجاب نا صوبائی حکومت تون پدریسہ رابطہ تخنگ نا پارت کرے۔ علی امین گنڈاپور پارے کہ غیر کانودی کوزہ گیر آتا کشنگ کن وزیر اعلیٰ پنجاب تون رابطہ کینہ، پوسکن آ لیز مارکیٹ ریٹ آتا لحاظ اٹ مرتب کننگے۔ دیوان اٹی آزاد جموں و کشمیر کونسل نا کنڈآن لاجز بلڈنگ نا گچین کاریم اٹ اتنگ نا بابت انتظامی و کانودی پلو آتا جاچ ءِ ہلک۔ دیوان اٹی اسلام آباد اٹی گلگت بلتستان کونسل سیکرٹری نا ماڑی نا تفنگ نا بابت باندات آتا جاچ ءِ ہم ہلنگا۔ بنجائی وزیر پارے کہ سرکاری ملکیت آتا کاریم اٹ اتنگ وزیراعظم عمران خان نا وژن نا رداٹ عمل اٹ اتنگے۔ سرکاری ملکیت ادارہ غاتا کٹیا ٹی ودکی و خڑچ آتیٹی کمتی نا سوب جوڑ مس۔
