خصوصی کمکار قومی جان جوڑی ڈاکٹر فیصل سلطان
اسلام آباد۔ 27 اگست (اے پی پی) وزیراعظم نا خصوصی کمکار قومی جان جوڑی ڈاکٹر فیصل سلطان پارینے کہ وزیراعظم عمران خان نا پارت آ زوت آزاد کشمیر اٹی جان جوڑی انصاف کارڈ ایتنہ، جان جوڑی انصاف پروگرام راجی رکھ انا غٹ آن بھلا السی و تاریخی ڈٹ ءِ، پروگرام نا دنگ ءِ ودفینن، 84 لکھ خاہوت ءِ پروگرام نا رداٹ مفت درمان نا آسراتی دوئی ءِ۔ داخیال آتا درشانی ءِ او 23 می نیشنل ہیلتھ سٹیرنگ کمیٹی نا دیوان نا کماشی ءِ کرسا کرے۔ دیوان اٹی پنجاب نا وزیر جان جوڑی ڈاکٹر یاسمین راشد ویڈیو لنک انا کمک اٹ بشخ ہلک، بنجائی سیکرٹری ہیلتھ ڈاکٹر عامر اشرف خواجہ ہم دیوان اٹی بشخ ہلک۔ دیوان اٹی چیف ایگزیکٹو آفیسر جان جوڑی آسراتی پروگرام خصوصی کمکار ءِ حوال تس۔ دیوان آن تران کرسا خصوصی کمکار پارے کہ وزیراعظم پاکستان نا پارت آ زوت آزاد کشمیر نا مخلوق ءِ جان جوڑی انصاف کارڈ فراوان کینہ۔ جان جوڑی انصاف پروگرام راجی رکھ انا غٹ آن بھلا السی و تاریخی ڈٹ ءِ۔ پروگرام نا دنگ ءِ ودفینن۔ اوپارے کہ کم و ود 84 لکھ خاہوت ءِ پروگرام نا رداٹ مفت درمان نا آسراتی دوئی ءِ۔ 90 ضلع غاتیٹی پروگرام داوخت آ برجاءِ۔ کم و ود 13 لکھ خاہوت آتے جان جوڑی انصاف کارڈ تننگ نا ہدف ءِ۔ ڈاکٹر فیصل سلطان پارے کہ خواجہ سرا و معذور بندغ آتے ہیلتھ کارڈ انا آسراتی فراوان کننگ انگ ءِ۔ فاٹا و تھر پارکر نا غٹ بندغ آتے ہیلتھ کارڈ انا آسراتی فراوان کننگ انگ ءِ۔ اوپارے کہ مچ آ ملک اٹی 305 ہسپتال پرائیوٹ اینڈ پبلک ہسپتال جان جوڑی انصاف نا پینل آٹی ءُ۔ اسہ ضلع نا ناجوڑ ایلو ضلع نا پینل آ ساڑی ہسپتال اٹی پروگرام نا رداٹ درمان کرفنگ کیک۔
