اسلام آباد۔ 27 اگست (اے پی پی) جہانی بینک پارینے کہ کوویڈ۔ 19 نا سوب آن سال 2020ء ٹی چاگڑدی مسافر آتیان بالی پٹ آتے دوئی مروک ریونیو ٹی 100 ارب ڈالر نا کمتی نا کساس ءِ۔ داہیت ءِ جہانی بینک انا نائب صدر کارین ایم فینکلسٹن اسہ بیان اسے ٹی پارینے۔ اوپارے کہ دین انا سوب آن سال 2020ء ایئرلائنز و بالی پٹ آتا صنعت کن نسخان دہ پک مسنے، داسال دین ولاک ڈاؤن نا پابندی تا سوب آن چاگڑدی مسافر آتا کچ اٹی 4.6 ارب نا کمتی نا کساس ءِ۔ داڑآن مچ آ دنیا نا ایئرپورٹ و چاگڑدی خذمت آتون گنڈوک ادارہ غاتے دوئی ریونیو ٹی 100 ارب ڈالر نا کمتی نا گڑتی ءِ۔ اوایئر پورٹ کونسل انٹرنیشنل (اے سی آئی) نا حساب وکتاب نا حوالہ ءِ ترسا پارینے کہ سال 2019ء ٹی چاگڑدی مسافر آتا کچ 9 ارب آن گدرینگاسس ہراسالانہ بنداوہ تیا 3.4 درسد زیات ءِ۔ اوپارے کہ ایئرپورٹ آتے ایئرلائنز و مسافر ہڑتوم آتیان روئی دوئی مریک و کوویڈ۔ 19 نا سوب آن نئے بیرہ مسافر بلکن ایئر لائنز آپریشن تیٹی ہم نمان کمتی مون آ بسنے۔ او حساب وکتاب نا حوالہ ءِ ترسا پارے کہ مچ آ دنیا ٹی ایئرپورٹ آک 33 کروڑ بندغ ءِ روزگار فراوان کننگ نا اسہ اہم ءُ ذریعہ اسے ءُ وخت اس کہ ایئرپورٹ آتے دوئی ریونیو مچ آ دنیا نا جی ڈی پی نا 10 درسد مریک۔
