اسلام آباد۔ 27 اگست (اے پی پی) واپڈا نا پن بجلی گھرتا پیدوار ملک انا تاریخ اٹی اولیکو وار 8 ءُ نیم ہزار میگاواٹ آن جُپا۔ تدوک آ دے پیک آورزاٹی واپڈا پن بجلی گھرتیان نیشنل گریڈ ءِ 8 ہزار 757 میگاواٹ بجلی تننگا۔ داکان مست پیک آوورزاٹی واپڈا پن بجلی گھرتیان قومی نظام ءِ زیات آن زیات بجلی فراوان کننگ نا ریکارڈ 8 ہزار 474 میگاواٹ ئس ہرا تدوک آ سال 11 ستمبر آ جوڑ مسوسس۔ پنچ شنبے نادے آ جاری واپڈا اعلامیہ نا رداٹ تربیلا و منگلا نا آبی کوڑی تیٹی دیر انا بڑزکچ، ارسانا پارت آ آبی کوڑی تیان دیر انا زیات اخراج و واپڈا پن بجلی گھر تا گچین آپریشن پیک آورز اٹی پن بجلی نا دا ریکارڈ ساز پیدوار نا بنداوی سوب آک ءُ۔ حساب وکتاب نا رداٹ تدوک آ دے پیک آوورز اٹی تربیلاہائیڈل پاور اسٹیشن آن نیشنل گریڈ ءِ 3331 میگاواٹ بجلی تننگا۔ تربیلا چارمیکو ودکی پن بجلی گھر آن 1410 میگاواٹ، وخت اس کہ غازی بروتھاآن 1450 میگاواٹ، نیلم جہلم ہائیڈل پاور اسٹیشن آن 870 میگاواٹ و منگلا ہائیڈل اسٹیشن آن 915 میگاواٹ بجلی تننگا۔ وخت اس کہ ایلو 781 میگاواٹ بجلی واپڈا نا ایلو پن بجلی گھرتیان جم وڑاٹ نیشنل گریڈ ءِ تننگا۔ واپڈا نا پن بجلی گھرتا کچ 22 ءِ ہرافتا جم پیدوار 9 ہزار 389میگاواٹ ءِ۔ داوخت آ واپڈا دیامربھاشاڈیم، داسو ہائیڈرو پاور پروجیکٹ و مہمند ڈیم انا مسہ بھلا ڈٹ آتیا کاریم کننگ ءِ۔ ہرافتا پوروی آ واپڈا پن بجلی نا پیدوار لائخی ٹی پین ہشت ءُ نیم ہزار میگاواٹ ودکی مریک۔
