اسلام آباد۔ 27 اگست (اے پی پی) بنجائی وزیر انسانی حق شیریں مزاری و بنجائی سیکرٹری انسانی حق ربیعہ جویری آغا’’پاکستان نا جیل تیٹی زالبول آتا حالیت زار رپورٹ‘‘ ءِ وزیراعظم عمران خان ءِ پیش کرے۔ دا رپورٹ اٹی ملک انا زالبول بندی تا حق آتا رکھ اکن المی کانود جوڑ کننگ، پالیسی و ہیلکاری اصلاحات آتا رداٹ اہم مشاہدات و سلاہ و سوج شین تننگا۔ پنچ شنبے نادے آ وزارت انسانی حق انا کنڈآن جاری پریس ریلیز نا رداٹ 29 مئی 2020ء آ، وزیراعظم عمران خان پاکستان نا زندان تیٹی زالبول آتا حالیت زار نا مطالعہ و اوفتا جاست وپاست کن اسہ کمیٹی اس جوڑ کرے۔ دا کمیٹی نا کماشی ءِ وزیر انسانی حق شیریں مزاری نا کماشی ٹی مس و چارتُو انا مد اٹ دا رپورٹ ءِ وزیراعظم ءِ پیش کننگا۔ کمیٹی نا ایلو باسک آتیٹی سیکرٹری وزارت انسانی حق(سیکرٹری)، سیکرٹری وزارت داخلہ، پنجاب نا ہوم سیکرٹری، سیکرٹری داخلہ، خیبرپختونخوا نا سیکرٹری داخلہ، سیکرٹری داخلہ گلگت بلتستان، انسپکٹر جنرل جیل خانہ پنجاب، انسپکٹر جنرل جیل خانہ جات سندھ، انسپکٹر جنرل جیل خانہ خیبر پختونخوا، انسپکٹر جنرل جیل خانہ جات بلوچستان، انسپکٹر جنرل قید خانہ گلگت بلتستان، بیرسٹر سارہ بلال (جسٹس پروجیکٹ پاکستان)، و حیاایمان زاہد(لیگل ایڈ سوسائٹی) اوار ئسر۔ دارپورٹ اٹی زیر سماعت مقدمہ بندی تا تناسب ءِ کم کننگ نا گرج ءِ مون آ تخنگانے۔ زالبول بندی تیکن سزانا گیگ بدل و غیر حتمی گام گیج تیار کننگ، نیز مچ آ ملک اٹی زالبول زندان و بیرک آتیٹی ہنکین و تعلیم و بحالی نا پروگرام تیٹی گچینی اتنگ، جیل کانود اٹی نظرثانی، انسانی حق انا خلاف ورزی و است ہسون گرج آتا انفرادی باندات آتا جاچ ءِ ہلنگ، عملہ نا تربیت، ذہنی جان جوڑی نا باندات آتا مقابلہ کننگ و رہائی آن پد انا پروگرام تے تیار کننگ نا سفارش کننگانے۔ کمیٹی ءِ ملوک آ سرکاری حساب وکتاب آن معلوم مریک کہ پاکستان اٹی ککل 73،242بندی تیان 1،121 زالبول ءُ ہراجیل انا آبادی نا 1.5 درسد مریرہ۔ پنجاب اٹی 727 زالبول بندی ءُ۔ سندھ اٹی 205، کے پی کے ٹی 166، بلوچستان اٹی 20 و گلگت اٹی کل مسہ زالبول بندی ءُ۔ پاکستان اٹی زالبول زندان نا کل آبادی نا 66.7 درسد انڈر ٹرائل بندی تیا تالان ءُ۔
