بنجائی وزیر ریلوائی شیخ رشید احمد 7 کروڑ روپئی نا خڑچ آن وویمن یونیورسٹی سکستھ روڈ اٹ چارمزلہ ہاسٹل بلاک نا تفنگ نا بنداو ءِ تخا
اسلام آباد۔ 26 اگست (اے پی پی) بنجائی وزیر ریلوائی شیخ رشید احمد 7 کروڑ روپئی نا خڑچ آن ویمن یونیورسٹی سکستھ روڈ اٹ چارمزلہ ہاسٹل بلاک نا تفنگ نا بنداو ءِ تخا۔ داوخت آ اڈ ہلوک آ دود آن تران کرسا شیخ رشید احمد پارے کہ راولپنڈی نا ہر ڈھوک اٹی تعلیمی ادارہ جوڑ کرینن، راولپنڈی ءِ چین نا کمک اٹ اسہ جہانی ءُ یونیورسٹی اس ہم ایتنہ، مسڑ، ایڑھ تا دعاتا سوب آن مرک انا باہ آن پدی بسٹ، جوان انگا قوم اکن جوان انگا لمہ و جوان انگا استاد المی مریک، ہنداسوب ءِ کہ راولپنڈی ٹی تعلیمی ادارہ غاتا جال اس تالان کننگ نا عزم کرین و داڑآ عملدرآمد کرین،مین لائن ون (ایم ایل ون) آ لمہ و چنا ہسپتال نا کاریم داسہ مسٹ نا جاگہ غا 6 بلین آ سرمس، لمہ چنا ہسپتال اسٹیٹ آف دی آرٹ ہسپتال مریک ہراٹی 14 آپریشن تھیٹر مریک۔ دانا نقشہ ءِ ای مانچسٹر آن ایسونٹ۔ چانڑدہ سال اسکان دا ہسپتال اٹ کاریم بند ئس۔ ڈسٹرکٹ ہیڈکوارٹر ہسپتال راجہ بازار ہم سواارب روپئی نا خڑچ آن پوسکن مننگ والا ءِ، داڑآکاریم بھاز زوت بناکیک۔ راولپنڈی ٹی اولیکو یونیورسٹی ءِ ہم ای جوڑ کریٹ و ارٹمیکو ءِ ہم۔ راولپنڈی ٹی چین نا کمک اٹ انٹرنیشنل یونیورسٹی اس تفنگک۔ ایم فل و پی ایچ ڈی کن دا یونیورسٹی نا الحاق ہم جہانی کہول آ مریک۔ ایم ایل ون آ وزیراعظم پاکستان عمران خان و چیف آف آرمی اسٹاف قمر جاوید باجوہ نا منت وار اُٹ ہرافتا کوشست آتیان ایم ایل ون منظور مس و داسہ 21 تاریخ ءِ دانا ٹینڈرہم لگک، 1886آن پد یک و نیم سال آن پد پاکستان نا تقدیر بدل مننگ والا ءِ، نالہ لئی آ 70 ارب روپئی خڑچ کننگک۔ لئی ایکسپریس وے 26 ارب روپئی نا پروجیکٹ ئس ہراکہ 14 سال انا تاخیر نا سوب آن 70 ارب روپئی آ ہنا سرمس۔ راولپنڈی اسہ رکھ ءُ شار اسے۔ ویمن یونیورسٹی ٹی سندھ انا 5 ہزار طالب علم خواننگ ءُ۔ داکان مست بنجائی وزیر ریلوائی شیخ رشید احمد ایم این اے شیخ راشد شفیق، وائس چانسلر عالیہ سہیل، ڈائریکٹر کالجز شیر احمد ستی تون اوار یونیورسٹی نا دنگ اٹ ہاسٹل بلاک نا تفنگ نا بنداو ءِ تخا۔ اوکان پد وزیر ریلوائی شیخ رشید احمد میڈیا نا سوج آتا ورندی ءِ ترساپارے کہ عثمان بزدار ہچ ءُ جاگہ اس ہِننگ اف، نواز شریف ءِ وطن آ پدی اتنگ نا بابت بنجائی کابینہ نا فیصلہ نا مخ تفی ءِ ہم کرے، یکم ستمبر آ اہم ءُ فیصلہ اس بننگ ءِ۔ لگک نواز شریف پدی بفک و شہباز، حمزہ جیل آ ہِننگ کیرہ۔ اپوزیشن یکجا اف، مولانا فضل الرحمان و شہباز شریف نا اوڑدہی بے سہب مس۔ شیخ رشید احمد پارے کہ اپوزیشن نا است انگا است خواہی نیب ءِ چٹفنگ ناءِ۔ اپوزیشن پاہک، نت تا دوتا ہورتے خلفبو ولے نیب ءِ چٹفبو۔ اسہ سوج اسے نا ورندی ٹی بنجائی وزیر پارے کہ اپوزیشن والاک یکجا مننگ کپسہ۔ مولانا فضل الرحمان ءِ دافتیا بھروسہ اف۔ مولانا شہباز شریف آ بے پتی نا درشانی ءِ کرینے۔ نواز شریف نا بابت بنجائی کابینہ نا فیصلہ نا مخ تفی ءِ کرسا اوپارے کہ نواز شریف پدی بریک انتئے کہ یکم ستمبر بھاز اہم ءِ و کیس آتا فیصلہ مروئی ءِ۔ کراچی ٹی پِر آ شیخ رشید پارے کہ کراچی ٹی الس دتر نا خڑینک شولنگ ءِ وخت اس کہ راولپنڈی ٹی نن اِرا تُو مست غٹ وسیلہ غاتے کاریم اٹ اتسا نالہ لئی نا پورو سفائی ءِ کریسن۔
