اسلام آباد۔ 26 اگست (اے پی پی) وزیر مملکت پارلیمانی امور علی محمد خان پارینے کہ حکومت کوویڈ۔ 19 اٹی پیشن نا ملک آتیٹی اختہ پاکستانی تے پدی اتنگ کن خصوصی چارٹر جہاز مون تس، راجی فاصلہ و ایلو پابندی تا سوب آن کرایہ تیٹی ودکی کروئی تما، داسہ متکن آ کرایہ بحال مسنے۔ چارشنبے نادے آ ایوان بالا ٹی وقفہ سوج آتیٹی سینیٹر مشتاق احمد، سینیٹر جاوید عباسی، سینیٹر عثمان کاکڑ و ایلوفتا سوج آتا ورندی ٹی اوپارے کہ حکومت کوشست کرینے کہ کوویڈ۔ 19اٹی دنیا نا چندی ملک آتیٹی اختہ مروک آ پاکستانی تے پدی اتنگے دا چرجوئی ٹی خصوصی چارٹر جہاز ہم مون تننگا انتئے کہ ون وے ٹریفک نا موکل ئس و راجی فاصلہ نا سوب آن مسافر آتا کچ ءِ ہم کم کننگ کن پاننگاسس ہنداخاطرآن مجبوری ٹی کرایہ غاتیٹی ودکی کروئی تما۔ اوپارے کہ داسہ متکن آ کرایہ بحال مسنے۔ اوپارے کہ کوئٹہ غا ہنوک آ جہاز آتیکن کرایہ ءِ کم کننگ نا باندات بنجائی وزیر ہوابازی نا نوٹس اٹ اتنگک۔ اوپارے کہ جہانی جہاز آتیٹی مسافر آتا کچ انا بابت زیات احتیاط کروئی تمک و ماسک و سینی ٹائزر آتا کاریم اٹ اتنگ غٹ جہاز آتیٹی المی ءِ۔
