اسلام آباد۔ 25 اگست (اے پی پی) بنجائی وزیر حوالکاری و شینکاری سینیٹر شبلی فراز پارینے کہ کنا باوہ احمد فراز ءِ پاکستانی الس آن بے مٹ مہرومریبت رسینگا۔ اوتینا قول و فعل اٹ ہچ ءُ تضاد اس تختو، امن، مہرومریبت و انسانیت اونا ادبی خذمت و عملی زند انا وت ئس۔ کنے مدام تینا باوہ نا شاعری تیان راہشونی ملانے، ورناک احمد فراز نا شاعری و رغاموک آتیان فائدہ ہرفر، نوشتہ کروک آتے راج انا گچینی کن تینا کوشست آتے برجاتخوئی مریک، ہموقومک شون ہلیرہ ہرا تینا روایت و قدر ءِ یات تخرہ۔ داخیال آتا درشانی ءِ او سے شنبے نادے آ شہرہ آفاق شاعر و ادیب احمد فراز نا 12 می کزیہ دے انا وخت آ اونا قبر آ حاضری، دعاپاتیا غان پد میڈیا تون گپ وتران و اکامی ادیبات پاکستان نا کنڈآن احمد فراز نا یات اٹی دعائیہ نشست آن تران کرسا کرے۔ داکان مست بنجائی وزیر تینا باوہ و شہرہ آفاق شاعر، ادیب و دانشور احمد فراز نا قبر آ حاضری تس، دعاپاتیا کرے و پھل آتا چادر اس شاغا۔ داوخت آ اکادمی ادیبات پاکستان نا چیئرمین ڈاکٹر یوسف خشک و چندی بشخ آتیان تعلق تخوک آ بندغ آتا بھلو کچ اس ساڑی ئسر۔ وزیر حوالکاری دا وخت آ میڈیا تون گپ وتران کرسا تینا باوہ نا 12 می کزیہ دے انا وخت آ دعاپاتیا کن ایچ ایٹ قبرستان آ بروک آ غٹ بندغ آتا منت واری ءِ ہرفے و پارے کہ احمد فراز تینا قول و فعل اٹ ہچ ءُ تضاد اس تختنے و تینا نظریہ غا سلیس۔ اوپارے کہ احمد فراز اسہ یکتا ءُ وڑاسے ٹی تینا لائخی تے نئے بیرہ منفے بلکن تینا شاعری نا کمک اٹ قوم و راج اکن اسہ کلہو اس ہلا ہراڑآ اینو ننے عمل کننگ نا گرج ءِ۔ اوپارے کہ احمد فراز ءِ پاکستانی الس آن بے پناہ مہرومریبت رسینگا ہرانا ہچ ءُ درور اس ملپک و دا مہرومریبت اونا تینا کاریم و مسخت کن جہد و خلوص نیت نا بھرم ئس۔ اوپارے کہ امن، مہرومریبت و انسانیت احمد فراز نا وت ئس۔ اوفلسطین و کشمیر نا آجوئی کن ہم توار بڑز کرے و پاکستان ءِ مقدم تخا۔ اونا شاعری اسہ کلہو اس ایتک ہرادے خوانسا اینو ہم راہشونی ملک۔ اوپاکستان نا سول سوسائٹی، میڈیا و غٹ مکاتب فکر انا منت واری ءِ ہرفے ہراخراب موسم آن پد ہم احمد فراز تون عقیدت نا درشانی ءِ کننگ کن اونا کزیہ دے انا وخت آ قبرستان اٹ یکجا مسر۔ اکادبی ادیبات نا چیئرمین ڈاکٹر محمد یوسف ہم بشخ ہلوک آتا منت واری ءِ ہرفے و احمد فراز ءِ خراج عقیدت پیش کرسا پارے کہ ہراڑے ہم ادب نا پن بریک احمد فراز نا پن شاعر، ادیب و ورناتا سفیر نا وڑاٹ چاہنگک۔ اوکان پد بنجائی وزیر اکادبی ادیبیات پاکستان نا کنڈآن تینا ادارہ نا اولیکو سروک و پاکستان نا شہرہ آفاق شاعر احمد فراز کن دعائیہ نشست اٹ ہم بشخ ہلک۔ داوخت آ بشخ ہلوک آتیان تران کرسا وزیر حوالکاری پارے کہ احمد فراز خوش قسمت ءُ انسان اس ئس کہ اودے الس نا مہرومریبت و شہرت نا بڑزیک رسینگار۔ اونا کروڑ آ مداح ملک و ملک آن پیشن اریر ہراہرسال اودے تینا دعاتیٹی یات تخرہ۔
