وڈی خوری نا زیات کچ انگا ملک آتیٹی جان جوڑی، تعلیم و راجی آسراتی نا بشخ آک زہمی مننگ ءُ، وڈی خوری نا توننگ کن پوسکن آ ٹیکنالوجی ءِ کاریم اٹ اتنگ ہم المی ءِ، آئی ایم ایف

اسلام آباد۔ 25 اگست (اے پی پی) جہانی مالیاتی فنڈ(آئی ایم ایف) پارینے کہ وڈی خوری نا زیات کچ انگا ملک آتیٹی جان جوڑی، تعلیم و راجی آسراتی و رکھ انا بشخ آک زہمی مننگ ءُ۔ داہیت ءِ جہانی مالیاتی فنڈ انا مالیاتی ادارہ نا ڈائریکٹر وکٹر گیسپر و ڈپٹی ڈائریکٹر پاولو ماورو تینا اسہ آرٹیکل اسے ٹی پارینے۔ اوپارے کہ وڈی خوری نا سوب آن حکومت آک السی فائدہ و فائدہ ہرفنگ کن گچین و شفاف پالیسی جوڑ کننگ اٹ بے سہب مریرہ ہرانا سوب آن السی پت اٹ کمتی بریک نیز ہراپیسہ غاک روڈ، خوانفوک آ ادارہ و ہسپتال آتیا خڑچ مریر اوفک وڈی خور زموار آتا جیب تیٹی کارہ۔ اوحساب وکتاب نا بابت پارے کہ ہرا ملک آتیٹی وڈی خوری نا کچ زیات ءِ ہموڑے کٹیا تے یکجا کننگ نا کچ ہم بھاز کم مریک انتئے کہ دا ملک آتیٹی زیات تر پیسہ رشوت و کک بیکس نا دروشم اٹ کاریم اٹ اتنگک دا حالیت اٹ جم زرگزران ءِ ہرفنگ نا کوشست بے سہب مریک، وڈی خوری نا زیات کچ انگا ملک آتیٹی جی ڈی پی نا کچ آن خراج وصولی تیٹی 4 درسد کم خراج یکجا مریک۔ اوپارے کہ وڈی خوری نا بیخ کنی کن سیاسی عزم و شفاف ادارہ غاتا ٹہیفنگ المی ءِ،، داڑتون اوار اوار ادارہ جاتی اصلاحات، کسبی سول سروس نا ٹہیفنگ، و وڈی خوری نا توننگ کن پوسکن آ ٹیکنالوجی ءِ کاریم اٹ اتنگ ہم المی ءِ۔