اسلام آباد۔ 25 اگست (اے پی پی) وزیر ریلوائی شیخ رشید احمد تون سعودی سفیر نواف سعید احمد المالکی اوڑدہی کرے۔ اوڑدہی ٹی ہڑتوم آ ملک آتا تین پہ تینی تعلقداری و تین پہ تینی است خواہی نا باندات آتیا گپ وتران مس۔ شیخ رشید احمد پارے کہ پاکستان و سعودی عرب نا تعلقداریک بھاز متکن ءُ۔ ہڑتوم آ ملک آتا الس نا است آک اسہ ایلو تون دھڑکرہ۔ پاکستان و سعودی عرب نا تعلقداریک اسلامی ایلمی و مہرومریبت آٹو۔ پاکستان و سعودی عرب جہانی باندات آتیا مدام اسہ ایلو نا موقف نا مخ تفی ءِ کرینو۔ وزیر ریلوائی شیخ رشید احمد سعودی سفیر نا وزارت ریلوائی آ بننگ آ اودے گلدستہ اس پیش کرے۔ سعودی سفیر بخیر کننگ آ اونا منت واری ءِ ہرفے۔ شیخ رشید احمد نا جان جوڑی نا بابت ہریفے و تین پہ تینی است خواہی نا باندات آتیا گپ وتران کرے۔
