اسلام آباد۔ 24 اگست (اے پی پی) پاکستان سٹیزن پورٹل آ ایف بی آر آفیسر آتا کارکڑد نا جانچ پڑتال پورو مسنے، پرائم منسٹر ڈلیوری یونٹ ءِ ایف بی آر نا آفیسر آتا کارکڑد رپورٹ رسینگا۔ پرائم منسٹر ڈلیوری یونٹ نا رداٹ چیئرمین ایف بی آر نا کنڈآن مون تروک آ حوال اٹی پاننگانے کہ ایف بی آر نا 68 آفیسر آتا ڈیش بورڈ نا جانچ پڑتال ءِ کننگا۔ ایف بی آر نا 10 بڑزکو آفیسر آتے ہیبدار کارکڑد آ سخت پارت و ناراضگی نا درشانی ءِ کننگا۔ حوال نا رداٹ باسک کسٹم پالیسی، ڈی جی کسٹم انٹیلی جنس، چیف کلکٹر بلوچستان ءِ ناراضگی نا درشانی ءِ کننگ نا لیٹر جاری کننگانے۔ چیف کمشنر آئی آر کراچی، چیف کلکٹراسلام آباد، ڈی جی کسٹم کراچی ءِ ہم کارکڑد ءِ گچین کننگ نا پارت کننگانے۔ ہیبدار کارکڑد آ باسک کسٹم آپریشن، چیف کمشنر آئی آر فیصل آباد آہم ناراضگی نا درشانی ءِ کننگانے۔ حوال اٹ آفیسر آتے شاری تا غاوتا بابت کارکڑد ءِ گچین کننگ ناپارت کننگانے۔ شاری تا ویل آتا است جم ایسر کپننگ نا حالیت اٹ سخت کارروائی نا پارت کننگانے۔ وزیراعظم آفس چیئرمین ایف بی آر ءِ 556 ایسر مروک غاوتا دُوارہ ملنگ نا پرمان کرسا پارت کرینے کہ شاری تا غاوتے دُوارہ میرٹ آ ایسر کننگے۔ چیئرمین ایف بی آر غاوتا ایسری نا رپورٹ ءِ جمع کرفے۔ رپورٹ نا رداٹ گچین کارکڑد نشان تروک آ آفیسر آتا ستاءِ کننگانے۔ باسک آئی ٹی، چیف مینجمنٹ آئی آر، چیف کمشنر آئی آر راولپنڈی و بہاولپور ناکارکڑد انا ستاءِ کننگانے۔
