اسلام آباد۔ 24 اگست (اے پی پی) وزیر خارجہ مخدوم شاہ محمود قریشی پارینے کہ بھارت نا انت کہ مرضی ءِ پارساکے، پاکستان و چین سی پیک آ پیش رفت ءِ برجاتخرہ، سعودی عرب پیسہ خواہس نئے وام آ تیل ءِ بند کرینے۔ داغٹ قیاس آرائی ءُ، کشمیر نا بابت بھارتی دعویٰ’’اٹوٹ انگ‘‘ ءِ نن امنا کپنہ و ’’تہہ نا باندات‘‘ آتے دنیا امنا کپک، بھارت جعلی’’فلیگ آپریشن‘‘ نا ناٹک ءِ کننگ کیک، بھارت کشمیری تا عزم ءِ پرغنگ اٹ بے سہب و جموں و کشمیر اٹ لاک ڈاؤن نا برخلاف علم بغاوت زیات مسنے، مقبوضہ کشمیر نا بھارت نواز شش سیاسی جماعت آتا اسیجائی اعلامیہ اہمیت تخک، اسرائیل نا بابت پاکستان دباؤٹی برسا فیصلہ کپک، پاکستان و سعودی عرب نا موقف اٹ پورو اسٹی ءِ۔ دوشنبے نادے آ وزارت خارجہ ٹی پریس کانفرنس آن تران کرسا وزیر خارجہ پارے کہ 5 اگست 2019 ء نا گام گیج آتیان کشمیری تا تشخص و جتا آئینی حیثیت ءِ لتاڑنگا۔ ہزار آ کشمیری ورناتے غیر کانودی وڑاٹ پابندسلاسل و کشمیری سرکڑدہ غاتے نظر بند کننگانے وخت اس کہ پابندی و غیر کانودی گام گیج آتا چرجوئی اسہ سال آن پد ہم برجاءِ۔ بھارت نا کنڈآن تہار کانود نا نافذ کننگ اٹ ودکی ہم مسنے۔ اوجہانی اقتصادی چاہندار آتابابت پارے کہ بھارتی گام گیج آتیان مقبوضہ جموں و کشمیر اٹ اسہ سال اٹی پنچ ارب ڈالر نا زرگزرانی نسخان مسنے۔ اوپارے کہ بی جے پی سرکار نا پاننگ ئس کہ نن دا گام گیج آتے کشمیری تا گچینی کن ہرفنگ اُن۔ بھارت پائے کہ اسہ سال اٹی ہموڑے اخس زرکاری بس۔ اوپارے کہ مقبوضہ کشمیر نا 6 پارٹی ہرا مہالو دلی سرکار نا کنڈآ ہرارہ داسہ او اوڑآن بدبیسہ ءُ دا بھلو بدلی اسے۔ وزیر خارجہ پارے کہ چین کشمیرآ پیدوار ءُ موقف اس اختیار کرے چین پیدوار وڑاٹ بھارت نا 5 اگست نا گام گیج آتے مسترد کرے و پیدوار پارے کہ دے ٹکی لداخ اٹ نن بھارت نا موقف ءِ امنا کپنہ۔ چین سی پیک آ مروک آ شک و شبہ غاتے ہم اسیجائی اعلامیہ ٹی مسترد کرے۔ وزیر خارجہ پارے کہ کشمیر نا بابت بیانیہ ءِ داسہ دنیا امناکپک۔ انٹرنیشنل کرایسز پڑک کشمیری تا جہد ءِ ہندی سیاسی مزاحمت اٹ تعبیر کننگ ءِ۔ اوپارے کہ بھارت نا کنڈآن جعلی فلیگ آپریشن نا ناٹک ءِ کننگ مریک۔ ای دا چرجوئی ٹی بھارتی عزم آن باخبر کرینٹ۔ اوپارے کہ بھارت کشمیر نا ویل ءِ سلامتی کونسل اٹ تینٹ درے و ولدا سلامتی کونسل نا قرارداد آتیان چپ گام گیج کرے۔ بھارت مدام دروغ انا سیبوءِ ہلک ولے دنیا جوان چاہک ہنداخاطرآن بھارت ءِ بے سہبی تون پدریسہ مون تروئی تمنگ ءِ۔ اوپارے کہ بھارت کشمیری تا عزم ءِ پرغنگ اٹ بے سہب مسنےو جموں و کشمیر اٹ بھارت نا برخلاف علم بغاوت بڑز مسنے۔ سی پیک نا بابت وزیر خارجہ پارے کہ سی پیک آ پاک چین موقف پیدوار ءِ، بھارت نا انت کہ مرضی ءِ پارسا کے، سی پیک آ پیش رفت ءِ برجاتخنہ۔ دا ڈٹ آن مچ آ ڈیہہ ءِ فائدہ مریک۔ علاقائی رابطہ غاک ودرہ بیشک تنقید مرسا کے پاکستان و چین تینا سفر ءِ برجاتخرہ۔ اوغانستان نا بابت وزیر خارجہ پارے کہ ننا است خواہی ءِ کہ انٹرااوغان مذاکرات نا بنا زوت آن زوت مرے و ہموڑے امن و سوگوی مرے۔ نن اوغانستان نا وتواجہی ءِ امنا کینہ و اوغانستان تون برادرانہ تعلقداری خوانہ۔ اوپارے کہ پاکستان خیر خواہی نا کوشست آتیٹی کمکار نا کڑد ءِ ادا کننگ ءِ۔
