اسلام آباد۔ 24 اگست (اے پی پی) سینیٹ نا قائمہ کمیٹی حوالکاری و شینکاری نا چیئرمین سینیٹر فیصل جاوید پارینے کہ اپوزیشن تینا وڈی خوری و منی لانڈرنگ ءِ بچفنگ کن اولیکو دے آن حکومت ءِ بلیک میل کننگ نا کوشست کننگ ءِ ہنداسوب ءِ کہ حزب اختلاف وزیراعظم نا پارلیمنٹ آن اولیکو تران آ ہڑدڑ نا بناءِ کریسر۔ دوشنبے نادے آ داڑے جاری تینا اسہ بیان اسے ٹی سینیٹر فیصل جاوید پارے کہ پاکستان تحریک انصاف نا گچین کاری تیٹی سرسہب مرسا حکومت ءِ سنبھالنگ آن پد اولیکو 5 منٹ اٹی اپوزیشن پاریسس کہ حکومت بے سہب مسنے۔ اوپارے کہ کشمیر ہیڈ لائن تیٹی ئس اوکنٹینر آتے مون آ کرسا کشمیر مشن ءِ پدی کننگ نا کوشست کریر و اولیکو دے آن کوروناوائرس نا دین آ عمران خان نا گچین حکمت عملی ءِ جھیڑہ ئی جوڑ کننگ نا کوشست کریر۔ سینیٹر فیصل جاوید پارے کہ کورونا وائرس نا دین انا بابت حزب اختلاف نا مچ آ مہم الس ءِ ریفنگ نا کوشست ئس۔ فیصل جاوید پارے کہ داسہ ایف اے ٹی ایف کانود ہرانا تعلق غریب آن ءِ اوڑآ ہم بلیک میلنگ کننگ ءِ، دابلیک میلنگ نا کمک اٹ تینا وڈی خوری و منی لانڈرنگ مقدمہ غاتیان جان ءِ خلاص کننگ خوارہ۔ اپوزیشن ہراوڑ جنرل مشرف تون این آر او کرسا مقدمہ غاتیان جان ءِ خلاص کرے ہمووڑ ننے آن ہم این آر او خوارہ۔
