اسلام آباد۔ 24 اگست (اے پی پی) صدر مملکت ڈاکٹر عارف علوی جہانی برادری آ زور شاغانے کہ او غیر کانودی وڑاٹ مقبوضہ جموں و کشمیر اٹ انسانی حق آتا لتاڑنگ نا نوٹس ءِ ہلے ہراٹی ہندوستانی حکومت بدترین لاک ڈاؤن نافذ کرینے و بے گناہ مخلوق ءِ انسانی حق آتا لتاڑنا شست کننگ انگ ءِ۔ داخیال آتا درشانی ءِ او اینو ایوان صدر اٹ بین الپارلیمانی یونین (آئی پی یو) نا صدر گودی گیبریلاکوئیوس بیرن تون اوڑدہی ٹی گپ وتران کرسا کرے۔ صدر ڈاکٹر عارف علوی پارے کہ بھارت کشمیر نا بے گناہ مخلوق آ دہشت گردی نا راج ءِ مسلط کرینے و مقبوضہ کشمیر نا مخلوق ءِ اذیت اٹ اختہ کرینے ہرا اقوام متحدہ نا قرارداد آتا اسُل خلاف ورزی ءِ ۔ اودا اومیت نا درشانی ءِ کرے کہ آئی پی یو بھارتی مقبوضہ جموں وکشمیر نا مخلوق نا حق آتا رکھ اکن تینا کڑد ءِ ادا کیک۔ صدر دورہ غا بروک آ شرفمند آتے حکومت نا سمارٹ لاک ڈاؤن پالیسی آن ہم معلومدار کرے ہرانا سوب آن کوویڈ۔ 19 دین انا چیلنج نا مون ءِ توننگا۔ گیبریلا کیووس بیرن پارے کہ اونا ملک تین پہ تینی است خواہی نا بشخ آتیٹی خڑکی تعلقداری تا مون آ دننگ کن پاکستان تون اواری اٹ کاریم کننگ نا خواہندار ءِ۔ ہڑتوم آ کڑدہ غاک ہڑتوم آ ملک آتا الس نا تین پہ تینی فائدہ غاتیکن غٹ بشخ آتیٹی ہڑتوم آ کنڈآتا تعلقداری تے پین سوگو کننگ نا گرج آ زور شاغا۔ صدردا اومیت نا درشانی ءِ کرے کہ آئی پی یو نا صدر نا دورہ پاکستان نا پارلیمنٹ و آئی پی یو نا باسک پارلیمان نا نیام اٹ پارلیمانی تعلقداری تے سوگو کننگ اٹ کمکار مریک۔ دیوان اٹی چیئرمین سینیٹ محمد صادق سنجرانی و سینیٹر مرزامحمد آفریدی ئسک ہم ساڑی ئسر۔
